Ya ta algun luna caba cu e makinaria di manipulacion di AVP ta den ful ehecucion y dia pa dia e partido aki kier sigui manipula mente di pueblo pa loke ta e situacion financiero desastroso cu nan a laga atras na final di 2017. Ta asina cu den un comunicado emiti pa sr. Michael Lampe, e parlamentario aki ta declara cu nos Prome Minister lo a entrega nos autonomia financiero na Hulanda. Pero ta con bo por entrega algo cu den pasado a ser entrega caba door di traicion di AVP?
Deficitnan astronomico
Ta bisto cu sr. Lampe ta hopi pober mes den su conocemento di historia di politica, ya cu tabata hustamente su partido AVP cu dia 27 di augustus 2015 a vota den sala di Parlamento pa entrega nos autonomia financiero na Hulanda mediante e ley di LAft. Y tur esaki debi cu Gabinete Eman desde cu nan a asumi poder na final di 2009 a crea recordnan di deficitnan hamas bisto den historia di Aruba, caminda por a mira cu na 2010 e deficit tabata –188.6 miyon florin, 2011: -325.2 miyon, 2012: -443.3 miyon, 2013: -332.8 miyon y na 2014: -405.8 miyon florin, cual den total ta suma den e 5 añanan aki so na -1695.7 miyon, pues 1.7 BIYON Florin! Ta pa motibo di e masacre den e deficitnan aki cu Hulanda na 2014 a dicidi di gara Gabinete Eman na su strop cu un Aanwijzing y un KB, te cu esaki a conduci na e welga di hamber door di e lider di AVP, Mike Eman. Pero finalmente e ley di traicion di Laft cu seyo di Gabinete Eman a pasa toch den Parlamento dia 27 augustus 2015. Anto ainda sr. Lampe tin e curashi di declara cu “durante e periodo di ocho aña di gobernacion di AVP, nunca nos pais a yega na rand di un crisis cu su autonomia”. Increibel, e declaracion estupido aki!
Manifestacion contra traicion
Sr. Lampe, ta con ignorante bo por ta como parlamentario cu te cu awe bo no a ni ripara mes cu, debi na e votacion y traicion aki di bo partido AVP, un ola di disturbio a surgi dilanti di edificio di Parlamento e tempo ey? Gabinete Eman a manda Riot Comando contra e manifestantenan y varios tabata e manifestantenan cu a bira victima di opresion y dictadura despues cu nan a haci uso di nan derecho fundamental di manifesta y mustra nan repudio pa e forma con nos autonomia financiero a ser traiciona door di AVP. Pues sr. Lampe, stop di grita y stop di firma tur disparate cu bo amonan ta pone bo dilanti pa firma. Alavez lo ta bon pa bo busca copia di e Afkondigingsblad –firma pa bo colega Dowers – pa loke ta concerni e Landsverordening di dia 31 di augustus 2015 y confirma pa bo mes kendenan ta e berdadero traidornan di nos autonomia financiero.
Redoblacion debe nacional y interes
Pero locual ta mas lamentabel ainda cu sr. Lampe no kier realisa den ki desgracia financiero su partido AVP a hinca nos pais aden. Tur e deficitnan acumula den 8 aña di tempo a conduci cu nos debe nacional a aumenta di 2.2 Biyon na 2009 te na 4.2 Biyon florin na 2017. Mas ainda sr. Lampe mester ta consciente cu e interes cu mester ser paga riba e megadebe aki a aumenta tambe di 116 miyon na 2009 te na 216 miyon florin na 2017, danki na su partido AVP. Pero no ta solamente e interes astronomico aki mester ser paga tur aña, pero na 2018 gobierno mester busca fondo adicional pa paga 66 miyon florin na e debe di e proyectonan PPP y cual suma lo aumenta te 81 miyon florin entrante 2019 y durante 25 pa 30 aña largo.
Pues na lugar cu sr. Lampe ta trece e storia falso padilanti di cu nos Prome Minister lo entrega nos autonomia financiero na Hulanda, e mester recapacita, busca informacion y datonan veridico y confirma pa su mes ta cual partido a causa henter e desaster financiero den e pais aki y cu a pone nos na rand di bancarota.
