Diasabra mey anochi, e bandera mas grandi di Aruba a bay halto bou di e tononan glorioso di nos Himno Aruba Dushi Tera canta pa Grupo di Betico. Un cede di MEP completamente yen na unda simpatisantenan a celebra e momentonan special aki.
Bou musica di Massive Brassband, un grupo di simpatisante a marcha for di e Rotondo na Plaza Status Aparte na Santa Cruz cu e bandera di Aruba direccion Cede di MEP. Una bes cu a yega Cede di MEP, Sr.Harry Croes kende ta esun encarga cu e proyecto aki a haci entrega di e bandera na Lider di MEP sra. Evelyn Wever-Croes.
Siguientemente, a hisa e bandera di mas grandi di Aruba den presencia di candidatonan di MEP y un publico anima cantanto hunto nos Himno.
Den su discurso e anochi aki, Lider di MEP a gradici tur esnan cu den pasado a lucha duro pa nos Himno y Bandera y a gradici tambe esnan cu awe ainda kier mantene esaki na grandi. A reflexiona riba con na aña 1976 e prome biaha cu nos bandera a bay halto cu tawata casi bou menasa y clandestinamente muchanan di scol por a participa na e aubade sinembargo awe cu orguyo ta mira bek cu ta sin miedo esaki a tuma luga.
Lider di MEP, riba e anochi exitoso aki, a felicita henter e pueblo di Aruba y a reflexiona riba e momentonan dificil cu Aruba ta pasando aden. Y a enfatisa cu e ta sigur cu Aruba lo sali afo mirando e stimacion cu nos tur tin pa nos dushi Aruba.
