Parlamentario Endy Croes durante su ultimo conferencia di prensa a baha fuerte riba partido AVP y su Parlamentarionan cual personalmente e ta considera hopi zwak y di peso pluma. Representantenan di AVP keto bay hibando e politica anticua unda nan ta tira chico pa raca Juanita. Pues ta lansa mentiranan sin cu nan por substancia pa kisas alimenta algun di nan simpatisantenan. Mescos e tempo aya cu nan a campaña cu lo “Elimina BBO”, asina tin hopi otro ehempel di nan mentiranan chupa for di nan duim. Uno cu Parlamentario Croes a splica na placa chikito y atrobe cu prueba den su man pa desenmascara AVP su mentiranan ta alrespecto e Barconan Crucero. AVP a demonisa MEP cu Aruba tabata na werki na 2009. Nos por corda un show grandi unda ex-Prome Minister Mike Eman hunto cu coleganan minister e tempo aya a bay para na WAF manera poco payaso pa haci un show momento cu nan a bin bek cu Carnival Cruises. Den 2018 ainda e Parlamentarionan zwak manera “panlefi” di AVP ta haci e expresionnan aki. Croes a trece cune como prueba durante e conferencia di prensa e “Annual Statistical Digest 2016” di Banco Central. Esaki ta un documento hopi amplio cu datonan di 1986 te cu 2016. Riba anexo (XI, XII) por tuma nota di e berdad. Na 2009 bou maneho di MEP a cera cu 327 calls na Cruise Ships mientras na 2015 esaki tabata 296 “calls” y na 2017 esaki a cera cu 307 “calls” di Cruise Ships. Pues na aña 2016 bou maneho di AVP a cera cu 20 barco crucero MENOS cu na aña 2009 cu tabata e maneho di MEP. Sin huzga ainda e miyones gasta of malgasta den ATA cual nos lo bin bek riba dje. Esaki ta e puro berdad y realidad riba henter e cantaleta y gritonan di desesperacion di AVP. Laga e advertencia aki ta bon cla cu na cualkier momento cu AVP lansa mentira nos lo responde cu prueba. Despues di 8 aña di un gobierno di AVP kende a redobla nos debe nacional di 43% pa 87% (lesa rapport CAFT) causando un desaster financiero nos por confirma cu e credibilidad di e partido y su politiconan ta totalmente na suela. Nan sinta keto den banki y laga politiconan cu amor pa e pueblo aki resolve hunto cu e pueblo e desaster cu nan a ocasiona.