Un dia despues cu a firma e acuerdo di e Conferencia di Mesa Rondo na Den Haag caminda Aruba ta haya su Status Aparte entrante 1 di januari 1986, Betico Croes a dirigi su mes na e Arubianonan biba na Hulanda durante Arubadag. Aki ta sigui parti di su discurso:
“Dama y cabayeronan, tabatin momento cu nos tabata emociona, tabatin momento cu bo wowo ta yena cu awa di emocion. Ora ta trata destino di bo pueblo, anto nan ta bin pone un nota bo dilanti y nan ta bisa bo “Take it or leave it”. Ora ta trata destino di bo pueblo, hamas nos a permiti ningun instancia pa bisa nos “Take it or leave it”. Den e conferencia aki nos a percura pa Hulanda respeta cu bo ta sinta na mesa cu representantenan di e pueblonan di e islanan di Antiyas Hulandes.
Pa tanto lucha cu nos a pasa den e proceso di demostracion, proceso di manifestacion y inauguracion di nos himno y bandera. Ademas e referendum y e accionnan di 1977, awe mi ta pidi e pueblo di Aruba, ora nos mester a haci concesion na e Conferencia di Mesa Rondo, nos a haci esaki cu consenshi limpi, pasobra ta ocho partner tin den e Conferencia. Nos mester a trata di yega na un acuerdo. Na e momento aki mi por bay drumi numa cu un curason trankil, pasobra loke nos a lucha p’e pa mas cu 50 aña largo, e pueblo di Aruba tabata anhela di por weit’e wordo realisa.
Awe dama y cabayeronan, compatriota, awe nos por participa na boso tur cu porfin despues di tanto aña di lucha, pueblo di Aruba por cana frente na laira. Pueblo di Aruba por bati riba su pecho, pasobra pueblo di Aruba ya lo no ta bay ta ciudadano di segundo categoria. Pabien pueblo Arubano. Y manera e luchador Mejicano Benito Juarez a yega di bisa: El respeto al derecho ajeno es la paz. Respeta mi derecho pa mi respeta bo derecho. Awe Hulanda, Antiyas Hulandes a respeta e derecho di e pueblo di Aruba. Cu esaki pueblo di Aruba ta bay priminti cu paz lo reina den Antiyas Hulandes, harmonia lo reina entre e pueblonan. Nos lo mantene tur cooperacion cu Corsou, Bonaire, Saba, Sint Maarten y Sint Eustatius. Nos lo mantene un relacion cu Hulanda. Awe compatriotanan, nos tin razon cu nos ta alegre. Nos tin alegria pasobra nos a logra un di e derechonan mas sagrado di e pueblo di por biba liber y nos kier mantene e lazonan di estrecho cooperacion cu tur isla di Antiyas Hulandes y cu Hulanda.
Awe Dia di Aruba tin un nificacion particular. No solamente cu riba Dia di Aruba nos ta conmemora e himno y bandera, pero di awo padilanti e ta Dia di Libertad di Aruba. Dama y cabayeronan, compatriotanan, laga nos celebra awe, laga nos cuminda otro y p’esey nos a bin tambe. Biba Antiyas Hulandes, Biba Hulanda y Biba Aruba”