Parlamentario Mervin Wyatt Ras: Gobierno ta sin rumbo den proceso di reapertura di refineria di San Nicolas

Mensahenan bruha, argumentonan cu no ta cuadra cu otro y un vision politico cu ta liña recta contra di otro, ta e impresion cu e Bijeenkomst di diahuebs ultimo a laga, caminda Prome Minister Wever Croes a bin duna informacion na Parlamento riba CITGO.
Parlamentario pa fraccion di AVP, sra Mervin Wyatt-Ras a mustra cu a spera un mensahe cu mas contenido, cu mas determinacion di e lider di gobierno relaciona cu e decision di CITGO pa slow down e proyecto aki.
“En realidad a spera di haya mas claridad di Prome Minister riba e esfuersonan cu su gobierno ta haciendo pa atende cu e desaroyonan cu a surgi den ultimo simannan y sinembargo despues di tanto pregunta haci dor di Parlamentarionan, en realidad gobierno no tabatin mucho di informa Parlamento riba kico specifico gobierno ta haciendo na e momentonan aki. Wyatt-Ras a haya alabes straño cu niun representante di CITGO tabata presente. Esaki no ta muestra di transparencia.
A haya for di algun dia caba un declaracion di Minister di Labor, sr. Glenbert Croes, kende durante di un reunion cu sindicato, ta informa cu mester cuminsa pensa riba un Aruba sin refineria mientras cu su persona siendo den oposicion, a organisa un manifestacion na porta di refineria cu mester para tur intento pa desmantela e refineria ya cu e ta algo sumamente valioso pa economia y e forsa laboral pa nos pais.
Nos ta na altura tambe di Parlamentario Marisol Lopez-Tromp kende a vota contra di e refineria y a vocifera den prensa cu reapertura di e refineria solamente lo trece polucion y prostitucion, mientras cu su lider, Minister Oduber, a sostene e decision di Gabinete Mike Eman pa haya un operador nobo den CITGO y den parlamento a contesta Lopez Tromp cu su persona ta kere cu ta posibel e combinacion di desaroyo turistico y un refineria pa San Nicolas.
Durante di e reunion di diahuebs no a bin mucho informacion di kico gobierno ta haciendo den e situacion actual cu a presenta, sigur mirando cu centenares di trahado lo a wordo manda cas y kico ta e vision di Gabinete Wever-Croes pa futuro di e refineria.
Te na suspension di e reunion Parlamento no a ricibi mucho informacion di gobierno y solamente a haya un copia di un ‘quickscan’ cu no ta bisa mucho di e esfuerso di gobierno aki, mientras cu ta di spera cu pa diamars ora cu e reunion wordo reanuda, Prome Minister bin cu mas informacion concreto riba maneho cu su gobierno ta hibando pa e refineria.
Algo cu segun Wyatt-Ras ta hopi dificil pa gobierno duna ya cu ainda no tin ni sikiera un plan di maneho di su gobierno pa loke ta asuntonan general di nos pais y tampoco a logra na entrega un presupuesto pa 2018 na Parlamento manera cu constitucion ta prescribi,” Parlamentario Mervin Wyatt-Ras ta mustra.