Un fecha historico den politica Arubano y te hasta den Reino Hulandes ta awe 7 maart caminda ta recorda cu exactamente 35 aña pasa a inicia cu e Conferencia di Mesa Rondo na Den Haag, Hulanda y caminda despues di un lucha largo y ferviente di e pueblo Arubano pa su libertad, porfin nos derecho di autodeterminacion a wordo reconoci y concretisa exitosamente dia 12 di maart 1983 na final di e conferencia aki.
Mocionnan di Eilandsraad
Aruba a inicia e proceso na un manera acelera desde 9 di februari 1971, fecha cu a funda e partido Movimiento Electoral di Pueblo (M.E.P.), cu e meta primordial pa realisa e anhelo di nos pueblo. Desde e tempo ey a ser organisa hopi cumbre politico pa nos por a convence tanto e politiconan di Hulanda como esunnan di Antiyas cu e constelacion Antiyano no ta un unidad berdadero y no tabata faborece Aruba. Alavez nos no tabatin e instrumentonan economico den nos man pa por a determina nos desaroyo den forma optimal. Ta den e cuadro aki e comision pa prepara nos structura estatal (RCOA) a acepta dia 24 januari y 24 di februari 1983 den Eilandsraad, mocionnan pa manda un delegacion, cu e instruccionnan necesario y cu un gran cantidad di condicion pa bay negocia na e Conferencia di Mesa Rondo na Den Haag, Hulanda, di dia 7 pa 12 di maart 1983.
Miembronan di e delegacion Arubano
Durante e conferencia aki nos pais tabata representa pa tur e partidonan politico, gremionan comercial, sindical y clero. E delegacion di Aruba na e Conferencia di Mesa Rondo tabata consisti di e siguiente personanan: G.F. (Betico) Croes, lider di e delegacion, N.O. Oduber, P.P. Kelly, M.I. Bislip, C.B. Boekhoudt, F.H. Croes, E.J. Vos, mr. J.H.A. Eman, B.J.M. Nisbet, J.R. Frank y ing. V. Kock. E conseheronan tabata mr. H.S. Croes, S. Cole M.A., drs. F. Croes, M.R. Croes R.A., mr. H. Fingal, mr. N.E. Henriquez, mr. J. van der Kuyp, E.F. Mansur, mr. T.M. Monzon, A.J. Muyale, A.I. Nicolaas, mr. P.J. Tchong, drs. H.O. van Trikt, mr. W. ter Weeme, mr. B.J. Wilms, M. Arends jr., M. Kuiperi, Pastoor J.J. Vijverberg y G. Wolff.
E maestro den strategia
E decision a wordo tuma pa nombra Betico Croes como e lider di e delegacion y e vocero oficial di e pueblo Arubano. Betico a sinti su mes sumamente honra, realisando tambe cu esaki ta e papel di mas importante den henter su carera politico. Durante e dianan di e conferencia aki tabata reina un tension tanto na Hulanda como na Aruba. Tur hende tabata pendiente di e desaroyonan di e reunionnan. Betico a mantene un postura sumamente skerpi durante tur e dianan di e conferencia. El a crece y bira un politico di un nivel cu hamas Hulandesnan a mira den historia politico di Antiyas. E tabata un maestro den strategia y dificilmente por a ser hinca den trampa. Y Hulanda a pone su politico mas destaca den arena, esta ex-Prome Minister Ruud Lubbers (dfm).
E Conferencia di Mesa Rondo a cuminsa y ya riba e prome dia caba Hulanda a pone e arma mas pisa riba mesa: Aruba mester yena e fecha di Independencia. Henter e siman ey e reunion interno y plenario a tuma lugar y Betico tabata consulta cu otro miembronan di e delegacion Arubano y tambe telefonicamente cu Aruba. Durante e Conferencia di Mesa Rondo tur atencion tabata concentra riba Betico. Betico ta acepta e exigencia di Hulanda of lo baha cabez?
Den e siguiente comunicado partido MEP lo elabora riba e resultadonan final di e Conferencia di Mesa Rondo basa riba e 33 puntonan di conclusion.