Dos Playa, Parke Arikok: Diahuebs mainta pa mas o menos 9’or di mainta ta drenta un informacion na e centro di Parke Arikok cu lo tin un lancha riba beach di Dos Playa y probablemente ta ilegal a caba di drenta nos isla.
Mesora e Park rangersnan a bay na e sitio y enberdad a topa cu e boto, mesora nan a cuminsa buska den e area y un poco pabou di Dos Playa nan a topa cu tres persona, nan a pone polis mesora na altura y varios unidad di polis incluyendo polis maritimo, Guarda Nos Costa y Kustwacht a bay direccion di Dos Playa.
Enberdad nan ta bin topa cu e lancha “La bella 1”, procedente di Las Piedras. E lancha tabata tin dos motor Yamaha riba dje y varios container cu gasolin. Riba e beach nan a bin topa cu varios life vest y cuater puppy morto di e rasa Pug.
Aparentemente lo tabata tin 13 persona abordo di e lancha. Na e sitio nan tabata papia cu entrenan tin muher y mucha. Inoficial a wordo bisa cu durante e buskeda autoridad a gara un di cuater persona, cual ta un muher.
E buskeda ta andando for di mainta y e helicopter di Kustwacht ta bulanda te den oranan di atardi ainda den e area di Dos Playa, mientras polis ta buskando den e Rooinan, ultimo ora nan tabata den Rooi Tambu buscando, pero sin resultado.
Un situacion hopi tristo con desesperacion ta pone hende riska nan bida y te hasta di mucha pa busca un mihor futuro, paso na Venezuela, bida ta hopi duro pa nan, no tin cuminda, no tin trabou, barionan ta keda simannan sin coriente of awa, un situacion hopi inhumano.
Sigur lo mester bin cu mas y mihor control na nos costanan, pa evita cu e tipo di aventuranan aki ta sigui sosode y alabes teniendo na cuenta cu den futuro cercano, e yegadanan di ilegal lo por sigui aumenta, mirando cu e situacion na nos pais bisiña enbes di drecha ta keda empeora. E problema ta cu nan no por drenta mas via aeropuerto, caminda autoridad lo por tabata tin un mihor control. Drentando ilegalmente nos isla, nos no sa ken y kiko tur nan ta drenta cune. E biaha aki te caminda nos sa, nan a drenta cu 4 puppy lamentabelmente a haya nan morto, pero nan sa drenta cu arma y droga tambe. Entre e bonnan sigur lo drenta algun cu mal intencion y ta net e personanan aki no tin nada registra di nan y no sa ken nan ta.