Oranjestad – E siman aki, Universidad di Aruba en cooperacion cu Aruba Tourism Authority y Aruba Timeshare Association a organisa un conferencia unda no solamente a reconoce e importancia di e industria di timeshare pa Aruba pero alabes a presenta y comparti informacion di un investigacion cu a tuma luga.
E concepto di timeshare a cuminsa na Aruba na aña 1977, na unda Aruba Beach Club a inicia como e prome na nos isla. Despues Playa Linda Beach Resort a sigui y durante decadanan 80 y 90, hopi otro den e mesun industria a habri nan porta.
Bishitantenan di timeshare ta representa un averahe di 26% di e total di nos bishitantenan stay-over durante e ultimo 20 aña – entre 1997 te cu 2017. Pa cu e mesun periodo aki, e industria aki a crece cu un averahe di 3.4%.
Pa loke ta trata e bishitantenan ‘afluente’ specificamente di Merca cu ta kedando na un timeshare na Aruba por bisa cu esaki a crece cu 5.7% durante 2017, si compara esaki cu e aña anterior. Ademas, e market share di e bishitantenan aki ta 57% di e total di bishitante pa Aruba entre 2013-2017 y nos por mira cu esaki a crece cu un average di 4% annual entre 2013-2017.
Kico esaki ta nifica pa nos economia? Estudio completo den cuadro di e delebracion a revela cu 20 % di nos GDP (Gross Domestic Product) a resulta di e industria di timeshare.
Por ripara cu e inventario di cambernan timeshare a keda relativamente stabil, mescos cu e cantidad di bishitante/doñonan di e siman(nan) di timeshare cu ta sigui bishita nos isla a keda stabil.
Aruba ta conoci den e region Caribense pa tin e porcentagemas halto di bishitantenan cu ta bolbe nos isla pa pasa nan vacacion. Esaki danki parcialmente na e industria di timeshare. Cambio clave den e periodo di ultimo 20 aña tabata introduccion di Marriott Surf Club na 2007.
E bishitante tipico cu ta doño di un timeshare na Aruba, ta di e asina yama generacion ‘baby boomers’. Hopi ta esnan cu ta trece nan famia cu nan durante nan estadia, cual riba su turno ta contribui na nos economia. Ademas, casi tur doño di timeshare na Aruba ta bishita nos destinacion pa mas cu 10 aña. Nan ta sinti hopi pasion pa nos isla y ta encanta cu nos cordialidad y nos amabilidad.
Aruba Tourism Authority ta sigui conduci diferente investigacion a base structural. No solamente loke e bishitantenan ta papia di nan experiencia ora nan ta na Aruba, pero tambe ta monitorea loke ta wordo bisa online, y despues di evalua ‘reviews’ y comentario riba mas cu 100 sitio di ‘review’ online por conclui cu aki tambe nos bishitantenan ta papia positivamente di timeshare aki na Aruba.
E industria di biahe ta dinamico, sinembargo, semper mester busca manera pa mantene e balans. Aki nos por pensa riba kico ta haci, cu e bishitantenan ta keda fiel na nos isla, mientras cu e enfoke mester ta riba iniciativanan pa crea, mehora y promove experiencianan autentico y unico di nos isla.
Un pabien ta bay pa e industria di timeshare y un danki na un y tur cu a y ta labora den e industria aki.