ORANJESTAD, Aruba: Diaranson Aruba Bank a tene nan Aruba Bank’s Economic Forum 2018, ofreciendo studiantenan di Universidad di Aruba y clientenan corporativo oportunidad pa haya informacion for di expertonan den e area di mercado laboral, hospitalidad y turismo.
E invitadonan presente a ricibi informacion riba e tema “cambionan demografico y crecemento economico” y e efectonan di esaki ariba nos pilar economico principal cu ta turismo. A base di encuestanan haci dor di studiantenan di Faculty of Hotel Management and Tourism HTMS, kendenan inicialmente a haci preguntanan riba futuro di hospitalidad y turismo na Aruba, kico ta e expectativa di e habito di duna trabou, si studiantenan kier traha den fin di siman, shifts, oranan largo y hopi mas.
Varios preguntanan tabata relata na embeyecemento di Aruba su forsa labor y con e presion di cantidad di Arubiano cu pensioen (y cu ta bay baha cu pensioen) ta afecta e mercado laboral, specialmente den e sector di hospitalidad y turismo. Tambe a trata e topico di “aging visitors”, specialmente den time share, unda a trata kico Aruba mester ofrece otro tipo di actividadnan pa bishitantenan di time share mas hoben y esunnan cu ta keda en general. Esakinan tabata topiconan cu hopi hende tabata interesa den dje pa asina sa unda e mercado ta bayendo y kico ta retonan como tambe oportunidadnan.
Turismo ta e pilar economico principal, esaki ta nifica cu e obhetivo final di turismo mester provee un standard di bida mas halto y mehoracion den calidad di bida di ciudadanonan. E topico aki a trece hopi pregunta y debate. Aki ta caminda tur panelista a sa di informa y conscientisa invitadonan riba efectonan di embeyecemento den sector di turismo y hospitalidad. Sin laga afo, e topico importante di conservacion, esta kico mester wordo haci pa retene y conserva Aruba su naturalesa, flora y fauna.
E anochi aki a conta cu diferente panelista cu a elabora riba nan area di experticio. E oradornan tabata Edwin Jacobs di SVB, Ewald Biemans di Bucuti & Tara Beach Resort, Ronella Tjin Asjoe-Croes di Aruba Tourism Authority y Varelie Croes di ATECH y apunta recientemente como e “Chief Innovation Officer” di Gobierno di Aruba.
Durante e anochi aki tambe a haci entrega di un check simbolico na Universidad di Aruba. Esaki ta representa e contribucion monetario cu Aruba Bank ya pa di dos aña consecutivo ta haci na e Center of Lifelong Learning di Universidad di Aruba, cu a wordo ricibi dor di John Wardlaw, decaan di e facultad FHTMS.
Aruba Bank ta gradici tur participante na e Aruba Bank’s Economic Forum 2018. Tambe a gradici Universidad di Aruba pa laga nan haci uzo di e aula pa e evento y tur orador cu a tuma nan tempo pa elabora riba diferente topico.