Caso Babel na Corsou por sirbi como ehempel pa casonan cu lo wordo trata den futuro na Aruba
Parlamentario Endy Croes a splica cu e caso Babel na Corsou por sirbi como ehempel pa futuro casonan na Aruba. Kico ta e caso Babel? Den Corte di prome instancia na Corsou, hues a duna sentencia 11 di maart 2016 contra Gerrit Schotte y Cicely van der Dijs. Schotte a keda sentencia pa entre otro acepta soborno di mas di 200 mil US dollar y falsificacion di documento. Alaves Schotte y van der Dijs ambos a keda sentencia pa conhuntamente laba placa di fondonan soborna. Hues a dicta sentencia den e caso aki, respectivamente 3 aña y 15 luna di cual 6 luna ta condicional. Banda di e castigonan aki Schotte a perde su derecho pa pone su mes eligibel den cualkier eleccion pa 5 aña.
Demanda pa kita propiedad
Sinembargo dia 15 di februari 2018 Ministerio Publico (OM) di Corsou a inicia den un regie zitting den e caso “Babel” aki un caso cu un demanda pa kita propiedad (ontnemingsvordering) contra Gerrit Schotte y Cicely van der Dijs. Ta trata di un proceso pa recobra placa cu Schotte y van der Dijs a acumula inhustamente, esta e asina yama “ontnemen van wederrechtelijk verkregen voordeel.” Durante e regie zitting esnan den defensa ta haya oportunidad pa pidi pa mas investigacion si nan no ta di acuerdo. Den e caso contra Schotte lo pidi Hues den promer instancia pa Schotte paga bek Afl. 1.861.692 esta 1.8 miyon florin. Den e pago aki ta inclui un pago di 800.000 US dollar cu segun OM a keda haci na Schotte riba cuenta bancario na Suisa riba cuenta di un compania estableci na Marshall Islands den cual Schotte tabata esun beneficiario di dicho cuenta. Contra van der Dijs a exigi un pago di Afl. 205.274 florin. Pues OM Corsou cu tur e “toolsnan” legal cu nan tin a haci alaves banda di tur investigacion un “Financiele Onderzoek” riba cuentanan bancario di Schotte y asina crioyamente bisa a sigui y monitor unda y con e placa a move pa por a “catch up” cu presunto culpabel.
Corupcion di marca mayor
Parlamentario Endy Croes ta duna esaki como ehempel paso na Aruba tin un famia doñonan di un radio esta Canal 90 unda rumannan, sobrina y sobrinonan den tur forma hunto a logra haya cooperacion di ex-minister Benny Sevinger pa un total di mas di 90 mil m2 na tereno cual hopi a wordo bendi mesora pa sumanan astronomico. Muy probablemente Benny tambe a ricibi su comisionnan pafo di Aruba. Esaki ta corupcion di marca mayor y lo wordo investiga profundamente. Ta spera cu OM na un manera deligente mescos cu OM Corsou lo sa di haci un ‘financiele onderzoek’ riba tur esnan cu a participa den e corupcion aki, cuminsando for di minister, amigonan na DIP, Chief of Staff den kantoor di Minister Sevinger, stroman y strovrouw y claro tur e famianan cu a enrikece nan mes na un manera ilicito. Por usa finalmente mesun Ley, esta “ontnemen van wederrechtelijk verkregen voordeel” momento cu e investigacion ta cla pa exigi presunto hendenan culpabel paga pa nan actonan y debolbe Pais Aruba tur placa y/of propiedad cu ta pertenece na Pais Aruba.