Oranjestad – Aruba, Diamars mainta durante un Press Conference Ministerio Publico hunto cu Inspectie Volksgezondheid a firma un convenio di cooperacion. Presenta tawata Inspector di remedi Sra Angela, Sra Pappers Inspector-General, PG y Sra Kardol fiscal di husticia encarga cu e cartera aki.
Esaki ta relaciona cu ventanan ilegal di remedi.
Di parti Ministerio Publico nos a haya e siguiente comunicado:
Entrante prome di januari 2017, e Ley riba calidad den cuido di salud publico a drenta na vigor.
Consecuentemente Inspeccion di salud publico (IVA) como organo independiente a bira responsable pa supervision di cuido di salud di habitantenan di Aruba.
Banda di e tarea aki cu ta cay na IVA, Ministerio Publico ta keda responsable pa e aspecto penal di violacion di reglanan riba e tereno aki.
Cuido di salud ta un valor grandi cu si mester, tin cu wordo gehandhaafd administrativamente, disciplinario of penalmente pa garantiza calidad y seguridad optimal den cuido.
A base di e Ley ya menciona, e inspector tin su mes autoridad administrativo. Den cuadro di esaki, IVA y Ministerio Publico lo reuni periodicamente tocante violacionnan di gran interes cu keda constata.
Den e reunionnan por ehempel, a keda dicidi si lo persigui un persona cu a viola e Ley of si lo dunele un multa administrativo.
E reunionnan aki ta tumando lugar caba desde prome di januari 2017, pa asina e hermentnan administrativo, disciplinario y penal por wordo implementa mas efectivamente, eficientemente y proporcionalmente posible.
E meta ta pa yega na un acercamiento integral y esey ta encera un sincronizacion interno y mutuo na tempo.
Pa formaliza y profesionaliza e cooperacion aki mas ainda, IVA y Ministerio Publico a yega na un acuerdo di cooperacion cu awe a wordo firma pa e Inspecteur-General y Procurador-General.
Pareu cu e cooperacion aki a bin tambe cu liñeanan di maneho nobo na momento di violacionnan di e Ley di remedi, e Ley di botica y e Ley di droga.
E richtlijn aki lo drenta na vigor desde 6 februari 2018.
IVA y Ministerio Publico lo dirigi nan mes entre otro, riba e venta ilegal di remedi. Esey ta un gran peligro pa salud publico di Aruba. Den cuadro di esaki lo actua hunto contra e bendedornan, caminda lo investiga tambe e paginanan di venta particular riba Facebook.
Alexander van Dam
Procureur-Generaal van Aruba