AVP mester para responsabel pa nan mal maneho hiba contra pueblo.
– Nos por a tuma nota di declaracion di ex-minister Richard Arends den prensa y por constata cu Arends un biaha mas ta recuri na malinforma y trata di manipula nos pueblo. Ta estilo di hiba politica aki di AVP a hinca nos pais den e desastre financiero cu e Gabinete Wever-Croes a hereda. E maneho di manipula cu cifra, bin cu Presupuesto fictucio y irrealistico, cu entradanan exageradamente halto y gastonan sumamente abao a hiba na consequencia cu awe ta existi Caft y un supervision financiero riba pais Aruba.
Señor Arends mester ta “een toontje lager” of mihor bisa simplemente keda keto, pasobra e deficit grandi y e desaster financiero cu Aruba ta den dje tin nomber di Richard Arends gestempel ariba tur pagina di e herencia financiero laga atras pa su gobierno.
Es mas ora cu e ex-mandatario kier bin broma cu gobierno tabata tin plan ya na 2010, e realidad ta cu e supuesto plan y maneho di su partido berde a hiba Aruba den un caos financiero, un welga di hamber bergonsoso y un supervision financiero.
Richard Arends si tin poco karakter y principio ainda, e mester tin berguensa, hende asina mester gewoon keda keto y no mester ni bay tribi di cuestiona esfuerso di otro. Esnan di e gobierno anterior y Arends lo yuda Aruba ora nan para responsabel pa nan actonan descabeya di manipulacion y falta di respet na nos yiunan, cu ta esnan cu ta wordo endeuda malamente pa e maneho di Gabinete Eman y su bende, cual Richard Arends tabata e consehero y autor principal den e debacle financiero aki.
Un cos cu Arends y AVP mester haci ta bay pidi despensa na e Pueblo aki cu largo bay nan a gaña y manipula pa asina nan grupo por a abusa di e Pais aki sin piedad. Keda keto, sera boca y tapa bo cara, e reaccion di Arends ta mustra cu e no tin ningun tiki gevoel y berguensa cu pa consequencia di nan maneho e pueblo tin cu bay paga pa esaki.
Gabinete Wever-Croes pa medio di minister señora mr. Xiomara Ruiz-Maduro y su team di profesionalnan ta trahando seriamente y haciendo nan maximo esfuerso pa trece nos finanzas publico den un estado manehabel y sostenibel a termino largo y esaki a ser treci dilanti tambe ora cu a reuni siman pasa cu e Colegio di CFT.
E situacion financiero di nos Pais hereda di gobierno di AVP ta precario y e gobierno aki ta scohe pa presenta e realidad financiero y no bay sinta manipula cu cifra djies pa cumpli cu un norma. Un vez mas e gabinete nobo y su minister di finanzas ta canando un caminda y lo tuma e pasonan necesario cu lo hiba nos realmente na un finansas publico manehabel y sostenibel.