ORANJESTAD – Hasiendo uso di e derecho cu nos consitucion ta brinda Parlamento, Sr. Richard Arends miembro di fraccion di AVP, a hasi un serie di pregunta na e minister encarga cu relacionan exterior, esta Señora Prome Minister, riba e ultimo desaroyonan pa loke ta trata e blokeo comercial riba islanan ABC cu a wordo imponi unilateralmente door di Venezuela.
E preguntanan ta relata na un splicacion di e contenido di e reunionan cu a tuma lugar diabierna ultimo, como tambe e rol di Aruba den esaki. “E peticion aki ta meramente pa Parlamento den su totalidad haña claridad riba e reunionan y negociacionan cu lo ta tumando lugar cu representantenan di Gobierno di Venezuela pa sali di e impase cu nos pais bisiña,” Sr. Arends a splika.
E parlamentario a remarka cu e informacionan cu e la a ricibi te awor ta via medionan di prensa, como tambe for di coleganan di Parlamento cu a sostene reunionan cu e mandataria riba nivel di partido. “Den su tarea pa controla Gobierno, esaki obviamente no ta e canal apropia pa ricibi dato ni tampoco informacion,” e la sigui bisa. “Ni Presidente di Parlamento a ricibi informacion oficial como representante di e organo di cual nos ta forma parti di dje.”
E blokeo comercial imponi pa Gobierno di Venezuela, como tambe e impedimento di movemento liber di nacionalnan hulandes pa Aruba ya ta durando 10 dia. Aunke cu relacionan comercial, especialmente importacion di productonan for di Venezuela, a disminui durante e ultimo añanan e efecto di e blokeo unilateral aki ta visible.