ORANJESTAD– Diabierna ultimo a tuma lugar un reunion entre e gobiernonan di Aruba, Corsow y Venezuela y e embahador di Reino na Caracas den nomber di Reino. E reunion a bin despues cu Venezuela unilateralmente a para comunicacion aereo y via lama entre Venezuela y e islanan. Debi na esaki centenares di pasahero a keda pega na Venezuela.
Danki na esfuersonan intenso di Minister President di Aruba sra. Evelyn Wever-Croes, y di Corsow sr. Eugene Ruggenaath, a logra – como excepcion riba e medida – pa trece e pasaheronan bek. E medida ta na vigor ainda y diariamente ta pone cu pasaheronan ta keda pega na Venezuela.
Pesey a yama e reunion diabierna 12 di januari ultimo. E reunion a dura 6 ora y na final a yega na palabracionnan por escrito. E delegacionnan a hiba e palabracionnan aki na nan paisnan pa confirma esakinan. E medida di 6 di januari ta sigui na vigor te ora e palabracionnan wordo confirma pa tur e demas paisnan. Vice Presidente Venezolano sr. Soltedo a duna su palabra cu pasaheronan di nacionalidad Hulandes cu destino Aruba, Curacao of Boneiro lo no keda pega.
Minister President di Aruba Evelyn Wever-Croes y alaves vocero di Reino a duna e siguiente declaracion na prensa despues di e reunion.
“E tabata un encuentro constructivo y positivo den cual ambos delegacion a delibera riba e preocupacionnan di e casonan di contrabando. A base di esey a traha un concepto di un declaracion cu awor ta cerca e gobiernonan. Nos ta spera cu dentro di corto por yega na un acuerdo”.