Diaranson 27 di december Hospital a haci traspaso di e departamento di PAAZ pa un institucion nobo, esta Fundacion Respaldo. Esaki tabata un momento historico no solamente pa nan pero pa Aruba henter. E instituto psikiatrico aki lo conta cu e sosten y guia di 2 director, esta dr. H. van Gaalen y sr. L. de Jong. E acuerdo aki lo cambia e cuido psikiatrico na Aruba y e insituto lo bay bira hopi mas specifico, asina sr. Ezzard Cilië, director medico di Hospital, a duna di conoce.
A cuminsa traha riba e cuido psikiatrico pa un traspaso mas o menos 15 aña pasa caba unda cu e ultimo tempo sr. Cilië y dr. van Gaalen a cera cabes y a duna e empuhe necesario pa asina esaki por a bira realidad. Despues di hopi aña Hospital ta hopi contento di a logra eherce e meta di traspaso awe. Pa comunidad di Aruba esaki ta nifica un mehoracion den cuido p’e grupo di categoria special, esta psikiatrico na Aruba.
Actualmente, e cuidi psikiatrico no ta alcansa e cuido necesario cu e poblacion Arubiano tin mester. No tin un instituto adecua pa atende cu e cantidad di hendenan cu problema di salud mental.
Pues, esaki tabata un paso hopi grandi cu nan a tuma pa futuro y Hospital tin e confiansa cu den e forma aki e lo mehora. E organisacion ta nobo pero lo crece hopi lihe, unda cu mester inverti den personal y unda cu e organisacion lo adapta su mes na e necesidadnan di e categoria di e pashentnan. E cuido lo bira mas completo di locual e ta aworaki.
Cu e acuerdo aki e cuido di Aruba a tuma un stap mas pa dilanti y pa mehora. Pa por a yega na e traspaso aki, e caminda tabata uno largo pa motibo di fondonan financiero cu e tipo di cuido aki tin mester. E tipo di cuido aki ta hopi caro y mester a convenci varios persona riba diferente tereno riba e importancia di esaki. Na final tambe por a logra convence politiconan pa nan tuma e stapnan necesario. E concepto pa yega na e traspaso a dura largo pero hunto cu sugerencia y consehonan di Hospital awo por a tuma un decision concreto.
Sr. Cilië a sigui splica cu PAAZ ta keda habri y e acuerdo aki ta uno administrativo y di structura unda cu Hospital ta keda responsabel. Tin hopi trabou pa haci y compromiso di Hospital ta pa duna sosten y yuda Respaldo tuma esaki over responsablemente.
Minister di Salubridad Publico, Danguillaume Oduber, a felicita Hospital p’e logro grandi aki. E mandatario a sigui conta cu problema mental ta un problema cu a crece hopi y cu comunidad mester atende cun’e. Gobierno tin prioridad pa cu esaki y cu e traspaso aki, gobierno a garantisa comunidad Arubiano cu lo bay atende cu e problema aki. E ta un problema serio cu ta afectando comunidad di Aruba, afectando famianan y p’esey ta necesario cu gobierno duna debido atencion na e problemanan aki.
Pabien na Hospital y fundacion Respaldo pa e traspaso oficial cu lo cuminsa efectua dia 1 di januari 2018.