ORANJESTAD, Aruba – E trabou di regla full e sistemanan di Informacion, Comunicacion y tecnologia (ICT) den e edificio nobo como condicion prome cu por a muda e personal y pashentnan tabata un trabou enorme unda e dos departamentonan di ICT y Informacion tabata encarga.
E trabou tabata consisti di 3 parti grandi. E prome parti tabata sea diseña, instala y configura ful un infrastructura nobo den e edificio. Di dos parti tabata configura e departamentonan, camber y camanan nobo cu nomber nobo den tur e aplicacionnan concerni y zorg cu tur e aplicacionnan aki por a comunica cu otro corectamente. Y di tres parti tabata e mudamento di e computers, printers, telefon, etc riba e dia di mudamento mes.
Cu e prome parti nos a cuminsa algun aña pasa cu e trabou grandi di inventarisa e demanda di kico e cuido di Hospital ta y ta desea di haci cu ful e netwerk, asina sr. Richard Fingal, Manager di ICT, a duna di conoce. E netwerk ta e “back bone” di henter e comunicacion di data y voice cu Hospital tin.
E netwerk ta percura cu tin acceso na e PACS (potret di e departamento di radiologia), EPD (electronisch patient dossier), Laboratorio, Botica, camaranan di siguridad, control di acceso (badge), VOIP telefon, diferente servers y computers y hopi mas. Tambe tur aparato medico cu ta uza e tecnologia moderno ta wordo conecta riba e netwerk unda cu e departamento di ICT mester sa di nan pa asina por diseña y hinca un sistema bon den otro. Nan a percura pa tur esaki prome y despues nan a cana e caminda diseña, inverti, i implementa un netwerk completamente nobo.
Sr. Stefan Lucas, Manager di Informatisering, a duna di conoce cu encuanto e parti 2 e departamento di Informatisering tabata encarga cu e configuracion di tur e applicion nan concerni, manera e EPD (electronisch patienten dossier), Laboratorio, Botica, Cushina, Finance, etc. Si e sistemanan aki no sa unda e camanan y e departamentonan nobo ta unda e pashentnan ta bay drumi e cuido no por haya e pashent den e sistema. Laboratorio por ehempel no sa unda pa haya e pashent pa haci un bloedonderzoek. Of cushina no sa ken ta drumi na unda y mester di cuminda.
Asina cu un pashent drenta den e edificio nobo y keda interna, den e sistema mester mustra claramente cu tin un pashent den e camber. Tambe ta importante cu e alocacion di e pashent ta comunica cu e sistema di laboratorio of botica. E integracion aki ta sumamente importante y tabata un preparacion grandi. “Con nos por a percura cu tur sistema por keda comunica bon cu otro tabata esencial”, asina sr. Lucas a duna di conoce. Na prome luga nan a haci testnan den un area pa mira si tur cos tabata comunica y pa despues por a haci esaki den e sistemanan di ‘operations’, cual ta e area cu e trahadonan ta uza diariamente.
Entre e departamentonan di Informatisering y ICT tabatin un bon cooperacion cu otro, asina sr. Fingal a duna di conoce. Hunto nos a regla e tarea grandi aki y a test esakinan profundo prome cu e mudamento.
Pa e parti 3 e departamentonan a planea hunto cu e departamento cu mester wordo muda. Riba dia di mudamento, claro cu tin algun reto ultimo ora cu mester a pasa ainda, pero esey nos a spera di antemano y tabatin persona cla pa resolve cualkier cos. Durante e mudamento a guia e coleganan den cuido cu a muda pa cu e configuracion nobo. E preparacionnan tabata hopi, pero esfuersonan a duna su fruto y asina tur pashent y colega por a muda cu exito den e edificio nobo.