Tres persona herida, den un accidente ariba De La Sallestraat

De La Sallestraat – Diasabra atardi algo prome cu 4’or ambulance, polis y Elmar a bay altura di Watergate, caminda un accidente a sosode y tin hende herida.
Na yegada di e polis, nan ta topa un Chevrolet Spark cu a dal strit contra un palo di luz.

Den auto algun dama cu ta mustra cu nan a caba di traha, door di e uniforman cu nan tawata tin bisti.
Den e impacto un di e damanan a dal su cabes den e windshield, indicando cu muy probablemente no tawata tin seatbelt bisti.

Tres ambulance a presenta y a cuminsa prepara tres ocupante pa nan wordo transporta pa hospitaal.

Elmar mester a bay trata cu e wayanan cu a cay ariba caminda, despues cu e auto a dal e palo di luz. Door di e mes un incidente aki coriente a bay den e area di Companashi.