E hecho cu e Gobierno anterior, den su estado demisionario, a dicidi pa trata temanan nobo como temanan coriente, ta un hecho y riba papel. Durante un conferencia di prensa semanal di fraccion di MEP, parlamentario Endy Croes a duna algun muestra di malversacion di placa di pueblo y a categorisa esakinan como “ e lobonan di Mike Eman”, cu tabata y ta rancando placa di pueblo na diferente manera. Ta hopi tin, e parlamentario a menciona.
Durante di e conferencia di prensa el a presenta algun prueba cu el a difundi na prensa, pa asina mira cu ta trata di casonan di basta seriedad.
Hopi di e casonan aki tabata resorta bao di minister Asuntonan General, cual ta cay bou Mike Eman, pero awor ta wordo pusha bao di prome minister actual, Evelyn Wever-Croes. Un di nan ta e ex presidente di ATIA, Michel Henriquez, kende ta cobra 25 mil florin pa luna.
Den e prome luna di gobernacion actual, e no a yega trabao ainda, segun parlamentario Croes. Tambe por a tuma nota cu e no tin un luga di sinta den Cocolishi y ora a verifica na tur e otro edificionan cu Mike Eman tabata huur pa aloca su campañadornan tampoko por a encontra cune. A check na edificio “ Bo Bario” y esun di “Innovatie” pero envano. E meneer aki lo ta sinta un caminda na cas ta cobra. Afl.25 mil florin pa luna no ta wega. A verifica cu Prome Minister actual di pais Aruba pero eynan tampoco e meneer aki a raporta na trabou te cu dia di awe. Su contracto ta core te cu otro aña. Abusonan aki no por mira luz di dia mas y lo wordo termina.
Cobra sin traha
Un otro comper, bao di e nomber Mark Hoveling, kende ta cobra rond 15 mil florin pa luna. Un otro muestra bao di Asuntonan General, no a aparece na trabao te cu awe, ningun hende sa kico e ta haci ni un da e ta traha. Pero si tin cu page pa luna.
Y asina a keda menciona varios otro ehempel di deroche di placa entre compinchinan di Mike Eman.
Por ultimo Endy Croes a laga atras un tip na prensa, pasobra e kier prensa yuda den e proseco aki pa haya tur informacionnan corecto y desenmascara e abuso di e gobierno anterior. El a menciona cu e Gobierno, ora cu el a baha, hopi documento a wordo firma despues di dia 22 di September. A hinca masha hopi hende. A mira bulto di documento. Ta calcula cu nan por yega di rond di 1000. Tur esakinan a wordo firma despues di dia 22 di September. Por corda cu Mike Eman a saca potret ora el a bay entrega su Gobierno, cual ta normal, prome cu eleccion. Esaki ta significa tambe cu gobierno ta bira demisionario y solamente por atende lopende zaken y nada nobo. E cabayero aki esta Mike Eman , den e resto di dianan cu el a keda, nan a basha firma bay gol y gaña hende. Pa mustra mañan, cu ta MEP ta kita hende for di trabou, pero e no ta bisa cu e no tabata tin ningun autoridad legal pa haci esaki. Pueblo ta Sintiendo e Cambio.