Papaya – Diadomingo anochi pa mas o menos 9:45 polis a haya notificacion di un otro caso di violencia domestico, e biaha aki un adres na Papaya.
Segun informacionnan haya, un homber muy probablemente pareha di e dama lo a maltrate y tambe un mucha di 5 aña.
E dama lo a haya golpi na boca y esaki tawata sangra. Esnan cerca lo a pasa man pa e criatura y sconde den cas, paso nan no sa unda e homber a bay y si esaki lo bolbe pa haci e mucha un daño.
Despues di e maltrato, e homber a bandona e sitio y polis a haya adres na unda e homber ta biba, cu ta na Calabas.
Mirando cu tin hopi mondi rond na Papaya esta caminda e incidente a tuma luga, algun patruya a busca rond pero no a logra topa cu e homber. Na su cas na Calabas tampoco a haye.
Ambulance a presenta na e cas unda e dama y e criatura tawata, pa dunanan asistencia medico.