ORANJESTAD, Aruba: Diasabra a tuma luga e di 3 edicion di “Women’s Football Day” di cual 27 pais di Caribe, miembro di CONCACAF, a participa. Den oranan di mainta trempan na stadion Frans Figaroa muchanan muhe di 6 aña bay ariba a yega pa participa na e evento aki. Arubaanse Voetbal Bond (AVB) tabata contento cu hopi mucha a participa na e evento. AVB a tuma e oportunidad pa reconoce atletanan Keeley Maduro, Chiara y Sophia Petrocchi cu a logra gana medaya na Chile.
Presidente di Arubaanse Voetbal Bond (AVB), Ing. Richard Dijkhoff a indica cu ta brinda oportunidad na muchanan muhe, specialmente esunnan di categoria 6 pa 12 aña, pa cera conoci cu futbol. Tambe ta conscientisa comunidad cu tin futbol femenino na Aruba. E dia aki tabata uno grandi, pasobra semper a considera futbol pa hende homber. Pero den e ultimo añanan tanto FIFA como CONCACAF a hinca hopi esfuerso den futbol femenino y awe por mira cu futbol femenino ta creciendo.
Richard Dijkhoff a haci un comparacion unda cu el a indica cu e seleccion masculino Hulandes no a logra clasifica pa mundial pero seleccion femenino a bira campeon di Europa y esaki ta un indicacion con futbol femenino ta creciendo mundialmente. Aruba no por keda atras y desde algun aña caba AVB ta dedica atencion na futbol femenino, pasobra kier mira esaki crece aki na Aruba. Tambe kier brinda e oportunidad na muchanan muhe pa nan desaroya nan mes di tal forma den futbol, pa asina dia di mañan nan por ta un bon persona den comunidad.
“Futbol ta e vehiculo cu nos ta uza pa por brinda e oportunidad na e muchanan. Por medio di nos stakeholders pa tin bon personahe mañan den comunidad”, asina el a indica. AVB tabata contento di a mira e cantidad di muchanan muhe cu a haya e oportunidad di core tras di e bala y esaki tabata nan prome experiencia ariba e veld di Noord.
Elvis Albertus, coordinador tecnico di AVB, tabata satisfecho di mira caranan contento di muchanan riba veld. Durante e dia di futbol femenino por a mira hopi mucha cu nunca a hunga futbol den grupo, pero na cas of scol cu amigonan. Diasabra e muchanan tabata hunga den un team di 4 contra 4 y e satisfaccion mas grandi cu tabata ora di mira e placer cu nan tabata pasa aden. “E mensahe cu nos kier hiba eyfo ta cu futbol no tin rasa, no tin color, no tin sexo, caminda tur hende ta bini hunto”, asina Elvis Albertus a indica.
Nicole Hoevertsz, secretario general di COA y miembro di IOC tabata presente na e Women’s Football Day, unda mescos cu na Aruba den tur pais di Caribe miembro di CONCACAF a pasa un dia completo dedica na futbol femenino. “Esey ta algo hopi great. Si mita di poblacion di mundo ta consisti di hende muhe, nos kier pa mas hende muhe bira activo den deporte”, asina Nicole Hoevertsz a expresa. E deporte di futbol ta importante pasobra e ta esun mas practica na mundo. COA ta apoya AVB y CONCACAF den e iniciativa aki, pasobra e ta pas den e politica di Comite Olimpico Internacional pa haya mas hende muhe den deporte. Un conseho cu el a duna tur mucha muhe ta pa disfruta deporte pasobra e ta dushi.