Enseñansa ta un derecho universal y constitucional y sigur tambe ta e base di desaroyo di un pueblo completo. Ta pesey bao di gobernacion di Gabinete Evelyn Wever Croes ta hopi importante pa enfoca riba calidad di enseñansa, infrastructura y cuido di tanto nos alumnonan como nos cuerpo di docentenan.
Calidad
Pa cu esaki lo mester concentra riba restructuracion di nos sistema escolar, cuminsando na reorganisa Departamento di Enseñansa, lo mester actualisa nos curiculo, cuminsa e proceso di modernisacion di nos enseñansa unda cu mester prepara nos docentenan pa e era digital. Banda di esaki mester stimula mas tipo di enseñansa riba nivel di MBO y HBO na Aruba, enfoca riba enseñansa pa adulto cu mester yuda esnan cu pa un of otro motibo a dropout y ta brinda nan e oportunidad di por sigui studia. Banda di esaki mester bin cu control riba calidad di enseñansa pa asina nos por yuda scolnan eleva nan nivel di enseñansa cu na final di dia pueblo completo lo beneficia di esaki.
Infrastructura
Hopi scol awendia ta den hopi mal estado y den condicionnan pesimo, tanto pa e docente como e alumno. Nos tin falta di cupo pa nos alumnonan y y tin scolnan cu nan capacidad a yega su maximo caba. Nos tin di enfoca pa den corto tempo no solamente renoba scolnan, pero tambe percura pa equipa esakinan pa e cambio unda cu mester prepara e infrastructura pa e alumno y e docente por ta comodo pero ta prepara tambe pa e modernisacion necesario. Mester traha scolnan y sigur e HAVO/MAVO na Noord ta un necesidad, pero tambe ampliacion di scolnan basico den cierto areanan cu a conoce hopi crecemento, tambe amplia e cantidad di cuponan pa scolnan special cu ta un realidad y cu mester di esaki pero cu parce a ser lubida. Hopi scol no tin un infrastructura deportivo y mester por brinda esaki na nan. Sigur mester percura pa mantencion di edificio pa asina esakinan por keda den condicion optimal. Stimula mas traimerdia den bista di e situacion di mayoria mayornan cu mester traha un of dos trabao pa sobrevivi y unda por constata un grupo grandi di hobennan riba caya den oranan di merdia.
Cuido di alumno y docente
Nos mester crea scolnan “safe” pa nos muchanan y docentenan, unda cu tanto e alumno como e docente ta sinti su mes confortabel na scol y den un ambiente sano. Den esaki nos mester enfoca den pone airco pa scolnan y tambe cameranan di seguridad na scolnan. Mester enfoca pa sigui capacita nos cuerpo di docente constantemente. Mester enfoca tambe den haci lo maximo pa por mehora e structura salarial di nos cuerpo di docentenan cu ta uno cu a keda hopi atras y sigur un cuerpo cu ta traha cu alma y curpa y invertiendo di nan mesun saco den educacion di nos yiunan.
Mi meta personal como parlamentario lo ta di enfoca riba e area di enseñansa y lo haci lo maximo pa nos Minister di Enseñansa duna oido na nos cuerpo di docentenan y cu nos por traha den union pa logra cambionan na bienestar di nos alumnonan y di nos pais.