Oranjestad: Diadomingo den oranan di mainta mane ta e tradicion di tur aña, Sinterklaas acompaña pa su zwarte pietnan a yega Aruba.
Maske henter anochi tabata tin maltempo, Sinterklaas no kier a defrauda e muchanan di Aruba y asina mes cu tanto strena cu lamper den oranan di marduga, ela haci tur su esfuerso y a logra drenta cu su Stoomboot den Waf di Oranjestad.
Sint cu su ayudantenan a wordo ricibi pa nos Minister di Cultura, Xiomara Ruiz Maduro. Esaki tabata alabes, e prome encargo oficial di Minister Ruiz Maduro, como Minister di Cultura. Minister den nomber di tur mucha na Aruba a yama Sinterklaas y su ayudantenan un Bon bini. Nos Minister di Cultura tabata acompaña pa su yiu homber Ethan Ruiz, kende tambe a bay pa yama Sint y pietnan bon bini.
Un multitud hopi grandi tabata para for di mainta trempan canto di caminda y den Waf, wardando e momento cu e Stoomboot mara den waf. Sinterklaas cu su pietnan a cana bay Plaza Betico Croes caminda lo tene un actividad te cu mas o menos 3’or di atardi.
Den e simannan nos dilanti y especialmente 5 di December, Sinterklaas y su ayudantenan lo pasa bishita varios cas na Aruba y parti regalo pa tur nos muchanan bon mucha di Aruba.
Arubanative.com tambe kier a yama Sinterklaas y tur su ayudantenan un bon bini na Aruba.