A traspasa 1.4 miyon pa e siguiente Minister di Enseñansa
ORANJESTAD, Aruba: “Y asina aki nos a yega na e momento hopi importante di e trayectorio di 4 aña aki. Awe den presencia di Minister di Financiën, Director di Financiën, e rapport oficial di finansas di e Onderwijdsfonds ta wordo ricibi“, asina Minister di Enseñansa, Michelle Hooyboer-Winklaar a duna di conoce.
E rapport ta subraya tur e fondonan ricibi, e proyectonan ehecuta y asina ta duna un bista amplio di e cuenta financiero cu ta asocia cu e Onderwijsfonds. E rapport financiero tambe ta provee e documento di e balans Afl. 1.4 miyon cu a resta di e fondo aki cu lo wordo traspasa pa e siguiente Minister di Enseñansa.
Manera cu e Director di Financiën a splica, por uza e rapport aki como un “ehempel” pa otro fondonan di gobierno pa finalisa e proceso di responsabilisacion. E proyecto nan di Onderwijsfonds ta varia, pero tur ta alinea cu e obhetivo cu a pone 4 aña pasa den Infrastructura, logro di nos studiantenan y desaroyo profesional di maestronan y e presupuesto aproba pa Parlamento di Aruba.
Minister Hooyboer-Winklaar a duna informacion riba algun di e proyectonan financia cu e Fondo di Enseñansa. “A financia un total di mas cu 60 proyecto cu e fondo aki, tur cu ta cuadra cu e vision pa Enseñansa stipula cuater aña pasa. Entre nan ta varios trabou infrastructural cu a tuma luga na varios scol, creacion di e Observatie Centrum na MDC cu ta duna muchanan cu por sigui un curiculo regular pero bou guia special y e programa di GED cu lo duna esunnan 17 aña of mas, cu no a logra obtene un diploma secundario e posibilidad pa gradua y sigui Enseñansa Avansa. Esaki ta djis algun di e proyectonan realisa door di e fondo aki.
Minister di Enseñansa a acerca Directie Financien pa crea e documento aki pa concretisa e responsabilisacion financiero rekeri prome cu traspasa e cartera pa e siguiente Minister di Enseñansa. “E siguiente paso cu por tuma ta pa e futuro Minister(s) di Enseñansa sigui midi e efectividad di e proyectonan aki pa por logra e obhetivonan y avansa den nos sistema educativo”, asina Minister Hooyboer-Winklaar a duna di conoce.
E mandatario saliente a gradici Marisa Coffie-de Kort cu a traha den e proyecto grandi aki, cu a cuminsa cu un idea ariba un papel, na e realisacion y administracion di tur e fondonan aki. “Cu hopi gratitud na tur esunnan cu a haci e momento historico aki uno posibel.”, e Minister a bisa na final di su discurso.