Procurador-General di Ministerio Publico di Aruba, mr A. van Dam, y e hefe di Meldpunt (Meldpunt Ongebruikelijke Transacties) a firma un acuerdo riba 20 di oktober 2017. Di e manera ey, e acuerdo cu tabata existi caba entre Ministerio Publico y e Meldpunt, a keda renoba. E acuerdo nobo ta forma un bon base pa e añanan venidero, pa yega na cooperacion y intercambio di informacion mihor ainda entre Ministerio Publico y e Melpunt, na interes di preveni y bringa labamento di placa y financiamento di terorismo.
E enfoke penal riba bringa labamento di placa y financiamento di terorismo tin prioridad cerca Ministerio Publico, pasobra e ta di gran importancia pa e lucha contra tur tipo di forma di criminalidad serio, manera ondermijning, y e proteccion di mercado financiero-economico di Aruba. Un bon cooperacion cu e Meldpunt ta crucial pa Ministerio Publico. E informacion procedente di e Meldpunt ta di importancia decisivo ora di cuminza investigacionnan financiero-economico.
Pa ilustra e importancia den e lucha contra labamento di placa, Ministerio Publico a tuma e iniciativa pa traha integralmente den e Afpakteam cu Cuerpo Policial di Aruba, Aduana, Fiot (Fiscale inlichtingen- en opsporingsteam) di DIMP (Departamento di Impuesto), FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba, Meldpunt y RST (Recherche Samenwerkingsteam). Crimen no mag di paga! Riba prome di maart 2017 Afpakteam a start sali. Ya a logra basta resultado.