ORANJESTAD – “Industria crucero ta conociendo un etapa di crecemento y Aruba Tourism Authority ta cla pa probecha di e oportunidadnan y alabes e retonan cu e ta trece cu n’e” asina Mario Arends, Cruise Manager na Aruba Tourism Authority a duna di conoce diahuebs ultimo durante e Cruise Symposium cu a tuma luga na Renaissance Convention Center.
E vision y maneho cu A.T.A. tin delinea pa cu nos industria di turismo crucero ta inclui un contacto estrecho cu liñanan di crucero, mehoracion di producto Aruba atrabes di infrastructura, experiencianan unico y un mantencion di e bon trato di nos bishitantenan.
Mundialmente, un average di 24 miyon persona anualmente ta haci uzo di un biahe riba un crucero y e gran mayoria ta scoge pa bishita Caribe. Segun Arends, esaki ta di spera, pasobra nos region ta e cuna di e industria crucero y e turista ta keda wak esaki como un destino preferencia y primordial. E cifra aki, aunke ta hopi, ta representa djis un parti chikito di e turismo den su totalidad. Asina mes, estadisticanan ta mustra cu e crecemento di e sector aki ta sigui den crecemento continuo.
E popularidad y bon reputacion cu ya nos isla ta goza di dje, ta yuda hopi den e esfuerzonan cu A.T.A. ta haci na nivel internacional. Aruba ta bende facilmente como destino den e itinerario di un crucero, pero esey no ta nifica cu no tin espacio pa mehoracion. Aruba Tourism Authority tin varios meta fiha pa optimalisa e resultadonan. Por ehempel, ta buscando pa aumenta e bishitanan di barco pa nos destinacion den e temporada abou cu ta di mei pa september y a base di acuerdonan haci, ta spera cu den 2018 lo surpasa e 800 mil turista crucero.
Actividadnan manera e Cruise Symposium Aruba, cu ta tuma luga anualmente, ta busca pa topa cu stakeholders incluyendo autoridadnan portuario, tour operators y comercio pa comparti e desaroyonan nobo, pero tambe brinda e herment y stimulo necesario pa mehora nos oferta. “Nos tin mas trabou pa sigui optimalisa y asina brinda un miho experiencia na e bishitantenan crucero durante e tempo cu un crucero ta keda na e isla,” asina Arends a comenta. No solamente renobacion di waf, pero otro proyectonan den Oranjestad, San Nicolas y otro partinan di e isla ta contribui na esaki.
“Tur cos ta draai rond di e experiencia di e turista y Aruba por ta contento y orguyoso cu esaki ta uno hopi positivo,” e ehecutivo di A.T.A. a duna di conoce. Esaki ta un dato confirma pa encuestanan detaya cu e companianan di crucero mes ta haci y respalda pa e investigacion propio di A.T.A.
Asina mes, A.T.A. ta kere cu mester sigui traha y encurasha nos comunidad. “… pa sigui traha, sigui ta creativo, sigui mantene nos producto na un calidad halto. Esaki ta añadi na e experiencia y e impacto economico cu e industria aki ta trece pa nos isla,” Arends a declara.
A.T.A. ta identifica e retonan tambe y ta traha cu sector publico y priva pa trata nan. Un ta e congestion di persona y su efectonan riba trafico ora cu tin barconan grandi of mas cu un barco den nos waf.
Adicionalmente, e tendencia di turismo na nivel global ta mustra cu e biahero ta buscando un experiencia diferente, mas unico y personal. Esaki ta e tipo di informacion cu a brinda na e participantenan durante e simposio pa asina nan por adapta nan producto y manera di haci negoshi.
Arends ta añadi: “Nos kier stimula nos partnernan pa pensa mas creativo y bin cu experiencianan mas leu cu e island tour of e jeep safari cu nos ta wak; cu ta hopi popular y nos mester di nan berdad, pero sigur tin e oportunidad pa sigui diferencia conectando cu nos cultura, nos historia y nos manera di biba.”
E simposio a inclui un workshop titula ‘The Power of Story Telling’ presenta pa Rosabelle Illes den cual hunto cu e ekipo di Aruba Certification Program, a pasa riba e storianan cu actualmente tour guides ta conta y con nos por yega hunto pa haci e experiencia mas real, interesante y unico na nos bishitantenan.