Het Arubaanse Padvindsters Gilde, conosi como APG ta un organisacion di scouting cu ta consisti di solamente miembronan femenino y a wordo funda na aña 1941. Na aña 1993, APG a bira un “associate member” di e organisacion mundial “World Association of Girl Guides and Girl Scouts”.
Na aña 2017, e organisacion orguyosamente a bira “full member”.
Het Arubaanse Padvindsters Gilde tin como meta pa contribui na e desaroyo di e mucha y hobennan femenino, pa nan kere den nan mes, respeta nan mes y otro nan pa medio di programanan educacional (no formal) y recreacional pa asina nan desaroya nan potencial y ta miembronan responsabel y futuro lider nan den nos comunidad.
APG su vision ta pa crea muhernan fuerte y balente den nos comunidad, creando un miho mundo di mañan.
APG tin grupo den diferente bario: Noord, Dakota, Santa Cruz, Savaneta y San Nicolas.
E organisacion ta consisti di 4 categoria: Beyisima di 4 pa 7 aña, Kabouter di 7 pa 11 aña, Padvindster di 11 pa 17 aña, Pionier di 17 pa 18 aña, Jong lider 18+ aña y Lider 21+ aña.
Nan ta hasi trabou boluntario manera na Fiesta Rotaria.
Durante aña 2024 nan a instala un grupo di hoben di categoria Jong lider di e organisacion.
Na comienso di 2025 nan a celebra denkdag unda cu nan a explora Aruba su flora & fauna y a educa nan di Aruba su cultura.
APG su hobennan ta lidera e drumband, y e gruponan di mucha mas chikito. Ta hopi bisto durante aña cu esnan grandi ta duna nan conosemento y guia over na e hobennan unda cu e hobennan ta lidera den e parti ehecutivo.
APG ta un organisacion ehemplar pa nos comunidad unda cu nan ta organisa evento special pa crea e oportunidad pa esnan hoben vocifera nan ideanan y necesidad y asina esnan adulto ta duna nan e espacio y oportunidad pa nan realise y asina crese.
Het Arubaanse Padvindsters Gilde a demonstra ultimo aña cu e balans di empodera hobennan ta e forma pa guia e ser femenino hoben pa tin exito den su cresemento y asina APG ta contribui na forma sernan femenino ehemplar desde nan 4 aña caba pa nos comunidad.
E grupo ganado lo ricibi su premio diasabra 26 di april na ocasion di celebracion di dia di Rey durante e ceremonia den Parke Wilhelmina.
