ORANJESTAD – Dia di Mama Tera ta observa riba 22 di april 2025, hunto cu e tema mundial pa e aña aki ‘Nos Poder, Nos Planeta’. E enfoke di e organisacion Earthday.org ta riba e importancia di energia renobabel y e accion colectivo cu nos por tuma pa proteha nos planeta pa futuro generacion tambe por disfruta di un mundo saludabel y menos dependiente di energia fosil. Pero tambe encurashando mas participacion pa accion y conservacion di naturalesa.
‘Nos Poder, Nos Planeta’ ta un yamada na cada un di nos pa uza nos influencia – como individuo, den nos comunidad, y den gobernacion pa sostene un transicion urgente y husto na un futuro di energia renobabel/duradero. Aruba ta conoci pa su naturalesa unico y tambe su hospitalidad. Ta p’esey ta reconoce e urgencia pa atende e topico di cambio di clima y pa promove practicanan sostenibel. Aunke con chikito e accionnan por ta, un poco di parti di cada un di nos ta yuda.
Durante Dia di Mama Tera 2025, diferente organisacionnan lo enfoca riba e miho practicanan y consehonan y probablemente organisa actividadnan pa conscientisa y stimula accion. Esakinan por encera algun di e accionnan aki:
- Haci limpi den area di naturalesa: Boluntarionan lo uni pa haci nos beachnan limpi, parkenan y areanan natural cu ta frecuenta hopi. Probecha e temporada di campamento 2025 pa uni e grupo di famia y amigonan pa haci y tene e area limpi di sushedad.
- Plantamento di mata: Iniciativanan pa planta mas matanan local pa fortifica nos ecosistema. Riba e pagina di DNM di Facebook por haya tur e sortonan di mata protegi pa leynan local. Pero por pensa pa planta otro matanan tambe manera, mata di seida (cuminda pa parha), mata di fruta of berdura. Tambe DNM ta encurasha comunidad pa sali busca matanan grandi y midi esakinan, asina ta aporta na e encuesta “midi nos matanan” riba e website di DNM, www.dnmaruba.org. E proposito ta pa haya esakinan registra pa proteha nan como matanan monumental cu balor halto den nos naturalesa.
- Tayer y/of presentacion educativo: Por busca un podcast cu sesionnan informativo tocante energia renobabel, conservacion di awa, reducion di desperdicio, y otro topiconan di sostenibilidad. Ta invita bo pa sintonisa nos podcast “Cadushi ta zona cu Dyrick” cu ta sali cada pasa 2 siman riba diahuebs. Sintonisa esun di e siman aki cu invitadonan sra. Olinda Rasmijn ex presidente di Stimaruba y sr. Pancho Geerman di Museo Arkeologico.
- Exposicionnan di producto y servicio sostenibel: Tin negoshinan local cu ta ofrece alternativa ecologico y tin productonan alternativo cu ta sostenibel. Considera uza un copi reusabel ora di busca bo copi koffie di tur mainta. Awendia por wak cu tin diferente caminda pa recarga autonan electrico. Corda riba e tasnan di compra reusabel.
- Campaña di conscientisacion riba media social: Pone un publicacion cu ta promove animo pa hende comparti nan compromiso y accionnan pa un planeta mas saludabel uzando e hashtag #DiaDiTeraAruba, #NosPoderNosPlaneta #ourpowerourplanet #earthaccionday. Tuma un accion, saca un potret di esaki y publica riba bo plataforma social preferi y uza e hashtagnan.
“Dia di Mama Tera ta un momento importante pa reflecciona y tuma accion” asina director di DNM. sr. Gisbert Boekhoudt a bisa. “Hunto, nos tin e poder pa crea un impacto positivo pa nos planeta. Nos ta invita cada habitante di Aruba pa participa den e celebracion aki y pa haci compromisonan duradero pa un futuro mas sostenibel.”
Aruba ta compromete na un futuro duradero berde y ta traha activamente na diversificacion di e economia pa asina reduci e dependencia riba combustible fosil. E celebracion di Dia di Mama Tera 2025 ta un oportunidad pa reafirma e compromiso aki y pa encurasha participacion di tur sector di nos comunidad. Nos ta invita tur miembro di prensa pa uni den e celebracion aki y asina yuda plama e mensahe di ‘Nos Poder, Nos Planeta’ na henter Aruba.
