Un di e stakeholdernan clave cu a responde inmediatamente na e apelacion di Gobierno ta Cruz Cora Aruba (Rode Kruis), cu sin duda a pone extra voluntario riba pia pa asisti durante e dianan crucial. Na Baby Beach, Cruz Cora a instala un post cu ta cla pa duna prome auxilio den cualkier eventualidad di emergencia. Gobierno ta expresa su gratitud na Marla Thiel-Dominguez di Cruz Cora y Presidente di Directiva, Stephen Daal, pa nan disponibilidad pa sirbi nos comunidad.
Sra. Thiel-Dominguez a enfatisa cu Cruz Cora tin dos patruya cu ta operando constantemente: un ta vigila e area entre Santo Largo y Baby Beach, y otro ta keda alerta entre Baby Beach y Zwart Mangel, pasando Santana di Cacho. E esfuerso voluntario aki ta un ehempel di solidaridad y compromiso cu Aruba.
Durante e reunion cu stakeholdernan algun dia prome cu Semana Santa, Gobierno tambe a haci un apelacion na AHATA pa yuda cu ekipo cu por facilita vigilancia di e zonanan mas frecuenta. Como resultado di esey, Cruz Cora a haya verrekijkers y dos UTV di huur como donacion for di AHATA. Prome Minister Mike Eman a gradici Tisa LaSorte y AHATA pa nan disposicion y cooperacion continuo pa e bienestar di nos pueblo y nos bishitantenan.
Prome Minister a tuma e oportunidad pa haci un apelacion na nos comunidad, y specialmente na e mayornan:
- Sea mas atento riba mucha- y menornan di edad;
- Evita drenta lama inmediatamente despues di come;
- Si un persona tin problema di salud, evita drenta awa sin supervision;
- Sea extra vigilante pa cu otronan, specialmente den lama.
Den luz di e acontecimentonan lamentabel cu a tuma luga den e simannan tras di lomba, Prome Minister a indica cu Gobierno lo hiba combersacion cu Cruz Cora, ATA, AHATA y otro instancianan, pa sondea e posibilidadnan pa facilita vigilancia riba beach na forma structural, pa preveni casonan lamentabel tanto pa nos localnan como pa nos huespednan.
Inicio di siman Prome Minister Mike Eman, hunto cu Minister di Turismo Wendrick Cicilia, a yama un reunion cu Strand Politie, KPA, AHATA, ATA y Cruz Cora pa traha un plan di maneho pa e siman di Semana Santa. E siman di campamento ta un periodo di union familiar, pero tambe un periodo cu ta exigi preparacion, extra vigilancia y responsabilidad pa garantisa bienestar di tur hende.
