Apreciabel comunidad di Aruba, specialmente bario di Simeon Antonio y Federacionnan Deportivo concerni.
Como Minister entrante, mi a hereda un situacion unda cu tin acuerdonan haci y discusion cu ta wordo hiba ariba maneho di nos facilidadnan deportivo.
Varios ta e decisionnan cu ta wordo tuma unda cu ta cuestiona e base huridico pa esakinan y cumplimento debido basa riba e acuerdonan haci, for di cual como Minister mi tambe ta responsabel.
Minister di deporte saliente a haci algun compromiso y awe mi ta sinta cu un situacion caminda cu tin varios partido ta sinti nan mes den incertidumbre.
Ayera atardi mi a haci peticion na Fundacion Lotto pa Deporte y Fundacion Facilidadnan Deportivo pa comparti tur documentacion cu tabata tin di tur acuerdonan haci durante e ultimo 20 añanan y tambe notulanan di decisionnan tuma recientemente di directivanan concerni.
Algun documento a wordo ricibi caba y mi lo yama un reunion cu e partidonan concerni.
Transparencia y ‘Good governance’ tin cu lidera cada decision cu nos ta tuma y mundo di deporte mester conoce algun cambio real, no solamente cosmetico.
Un bon diabierna santo y fin di siman pa boso tur.
Minister di Relacionnan den Reino, Enseñansa, Hubentud, Innovacion y Deporte
Gerlien Croes
