Oranjestad, 17 di april 2025 – Minister di Finansa, Asunto Economico y Sector Primario, Geoffrey Wever, a participa den un reunion importante cu Centrale Bank di Aruba (CBA) caminda a trata tanto e desaroyonan economico reciente como reformanan legislativo crucial pa e stabilidad y proteccion financiero na Aruba.
Enfoke riba desaroyo actual y preparacion pa futuro.
Den un dialogo strategico, CBA y minister Wever a analiza e situacion economico actual di Aruba y expectativa pa futuro. Un di e puntonan halto cu ta haña atencion continuo ta e desaroyonan internacional, particularmente e tariffnan comercial impone pa Merca y su posibel efectonan riba importacion, inflacion y turismo.
“Aruba ta sigui traha pro-activamente riba preparacion pa anticipa cambio y defende e stabilidad economico di nos pais” — Minister Geoffrey Wever.
Progreso legislativo pa proteccion di consumido y transparencia financiero.
Durante e reunion, CBA a entrega na minister Wever un serie di concepto di ley cu ta forma parti di e reforma structural den e sector financiero:
- Concept-Landsverordening toezicht betaaldienstverleners y
Concept-Landsverordening toezicht aanbieders van betalingssystemen: e dos ley aki ta orienta riba reforza supervision y transparencia den servicio di pago, incluyendo tarifanan bancario y acceso husto pa usuario. - Ontwerp-Landsverordening basisbetaalrekening: un propuesta legislativo cu ta promove inclusion financiero pa tur residente den Aruba, asegurando cu cada ciudadano por haya acceso na un cuenta bancario basico, sin barera innecesario.
Minister Wever a expresa su aprecio pa e trabou tecnico y visionario di CBA y a confirma cu e leynan menciona lo wordo analiza cu prioridad den marco di reforma economico y social cu Aruba ta trahando riba dje.
“Transparencia, acceso y proteccion ta clave si nos kier un sistema financiero moderno y solidario. E documentonan entrega ta crucial pa nos prome paso legal y structural,” minister Wever a señala.
Ministerio di Finansa lo sigui traha den colaboracion cerca cu CBA y otro instancianan relevante pa asegura un implementacion efectivo y balansa.
