Oranjestad, 16 di april 2025 – Minister di Finansa, Asunto Economico y Sector Primario, Geoffrey Wever ta den preparacion pa un serie di reunionnan importante na Washington D.C., caminda lo sostene dialogo strategico cu institucionnan financiero internacional. E delegacion Arubiano ta inclui representantenan di Directie Financiën, Banco Central di Aruba y Departamento di Asunto Economico.
E bishita ta representa e prome encuentro internacional di minister Wever den su rol como minister di finansa, y ta sirbi como plataforma pa fortifica relacionnan, actualisa informacion y evalua posibilidadnan financiero pa e futuro di Aruba.
Minister Wever lo reuni, entre otro, cu World Bank, IMF, UBS, Santander, Deutsche Bank, JP Morgan, Standard Chartered Bank, CITI, y tambe cu agencia di rating manera Moody’s y Standard & Poor’s. E encuentronan ta enfoca riba:
- Posibilidad di refinanciamento di debenan existente
- Reduccion di tasa di interes riba deuda estatal
- Mehoracion di posicion fiscal y crediticio di Aruba
- Promove un marco di desaroyo economico sostenibel y inclusivo
Lo hiba diferente conversacionnan tambe cu institutonan internacional relaciona cu e aumento di tarifanan di importacion na Merca door di Presidente Trump y su posibel efecto riba Aruba su economia.
“Un maneho responsabel di e finansa publico no por ta basa solamente riba control; mester tin efecto real riba e calidad di bida di e pueblo. Nos mester balansa crecemento economico, inversion duradero, poder di compra, control debido y entrada stabil pa gobierno,” minister Wever a indica.
E reunionnan na Washington D.C. ta un paso importante pa mantene stabilidad y progreso financiero di Aruba, den cooperacion estrecho cu partnerman global.
