Diamars mainta a yama un conferencia di prensa extraordinario pa asina duna un actualisacion riba e situacion tumando luga den Korrectie Instituut Aruba (KIA) caminda tin caso di tuberculosis. Minister di Husticia, mr. drs. Arthur Dowers a informa na prome luga riba e cifra, cu a bira awo di cinco caso pa ocho caso di tuberculosis den e prizon. Pero na mes momento a indica cu a tuma tur medida di precaucion necesario den KIA.
A limita bishita familiar na tur detenido. Comunicacion entre detenido y nan ser keri, lo ta den forma digital (video call) pa asina evita contacto/bishita directo cu familiar. Esaki ta conta igualmente pa e casonan cu ta rekeri di presencia di e detenido na Corte di Husticia. Tur lo ta den forma digital pa evita transporte di detenido y contaminacion di otro area pafo di e instituto.
Minister Dowers lo tin algun reunion entre otro lo trece hunto diferente specialista den e ramo, manera entre otro di salud publico, doktervdi prizon, specialista di hospital como tambe dokter di pulmo pa asina haya un evaluacion di e situacion y e siguiente paso pa tuma.
Tambe a informa cu mas hende lo pasa den procedura di testing pa mira si tin un contagio mas grandi cu locual tin confirma te na e momento aki. E casonan di tuberculosis a cuminsa den luna di december di aña pasa, aunke no den forma agudo manera ta awo. Minister Dowers a indica cu lo ta na su luga pa haci un investigacion, mirando cu no tur e pasonan corecto a keda tuma pa evita mas contagio y siña di esaki pa futuro.
