Coordinacion multi-institucional
Dialuna 14 di april, Minister di Turismo, Transporte y Labor mr. Wendrick Cicilia hunto cu Prome Minister Mike Eman a reuni cu diferente instancia gubernamental y stakeholders e.o. Cuerpo Policial Aruba, AHATA y ATA pa trata e retonan cu a surgi den sector turistico, particularmente relaciona cu siguridad riba nos isla y nos beachnan.
E reunion a tuma luga despues di varios incidente recientemente cu a trece preocupacion den comunidad y den sector turistico; su meta principal tabata pa traha riba un plan di maneho structural y strategico cu ta cubri solucion tanto a corto como a largo plaso.
Un enfoke integral y coordinacion multi-institucional
E gabinete actual a duna atencion integral na e preocupacionnan y a enfatisa cu siguridad ta un prioridad nacional. Durante e reunion a repasa e diferente momento di preparacion y accion tuma pa fortalece e infrastructura di siguridad, particularmente durante e periodonan di actividad intensivo manera e siman di Semana Santa. Cuerpo Policial y Strandpolitie a presenta nan strategia na Ministerio di Turismo, y Tourism Security Patrol Aruba (TSPA) a asumi un rol mas prominente den mantencion di orden y proteccion riba nos beachnan.
Rol di boluntario y sostenabilidad
Cruz Cora ta brinda un yudansa crucial den e fin di siman, sigurando un presencia voluntario di e profesionalnan capacita pa duna prome auxilio, incluyendo asistencia vital manera CPR. AHATA, como un di e partnernan clave, a indica cu lo sigui duna sosten logistico na Cruz Cora pa garantisa continuidad den e responsabilidadnan riba nos beachnan.
Compromiso pa proteha nos turismo
Minister Cicilia a enfatisa cu siguridad mester keda garantisa constantemente, pero particularmente den e dianan mas ocupa cu nos tin nos dilanti. E reunion ta mustra un esfuerso colectivo pa yega na un enfoke coordina cu ta pone bienestar di tur hende, tanto residente como bishitante, central den tur decision.
