Den conexion cu conscientisacion pa cu abuso sexual contra nos muchanan
ORANJESTAD – Manera ta conocí dia 11 di April ta e dia cu ta pidi tur hende pa bisti na blauw pa asina mustra nos solidarismo contra e lucha di abuso sexual di mucha y cualkier otro tipo di abuso cu ta ser cometi contra nos muchanan.
Parlamentario Evelyn Wever-Croes a indica di a busca algun tshirt pa miembronan di fraccion di MEP for di Fundacion Mi Voz Ta Bo Voz, cu ta un fundacion cu pa hopi aña ta activo riba e tereno di prevencion di abuso contra nos muchanan. E meta di bisti na blauw riba e dia aki ta pa crea conscientisacion y pa laga nos vos resona hopi mas duro den comunidad.
Tesorero di Fundacion mi Voz Ta Bo Voz señora Julie a haci entrega di e tshirtnan na Fraccion di MEP na Parlamento, y a tuma e oportunidad tambe di invita pueblo en general pa bisti na blauw riba 11 di April pa asina crea mas conscientisacion riba abuso sexual y abuso en general di nos muchanan.
Gabinete Wever-Croes durante su gobernacion a haci hopi pa cu prevencion di abuso sexual contra nos muchanan, creando leynan y fortifica e institutonan encarga cu e tarea di prevencion.
Parlamentario Wever-Croes a expresa cu nos muchanan ta wak nos como adulto pa nos cuida, protehe, duna nan cariño y stimanan. P’esey e ta pidi comunidad completo pa ban nos tur bisti blauw diabierna 11 di April pa asina un biaha mas reconfirma nos compromiso cu nos muchanan cu ta asina valioso pa nos tur. Ban nos tur uni den e lucha contra abuso sexual di mucha y contra tur otro tipo di abuso contra nos muchanan.
