Diamars, 8 di april, Secretario di Estado Hulandes, Zsolt Szabó, a realisa un bishita oficial na Centro di Gobernacion pa cera conoci cu e ministernan di e recien forma Gabinete AVP-Futuro. E bishita a inicia cu un reunion entre Secretario di Estado Szabó y Prome Minister mr. Mike Eman, hunto cu Minister di Asuntonan di Reino, mr. Gerlien Croes, sigui cu un presentacion formal di henter e gabinete.
Durante e reunion, a trata e futuro di e relacionnan den Reino for di e perspectiva di e gobierno nobo. A discuti topiconan importante pa Szabó y cu ta den liña cu e vision di Gabinete AVP-Futuro. A reconoce un fundeshi solido pa reforsa e lasonan den reino riba un base di respet mutuo y beneficio comparti, un “win-win situation” pa Aruba y reino.
Hulanda ta mira den direccion di Aruba pa sondea e areanan di cooperacion banda di locual tin caba na palabracion den e landspakket y e rijkswet cu lo bin. Gabinete AVP-Futuro ta para pa un vision amplio di desaroyo, cu ta pone enfasis riba un crecemento socio-economico sostenibel, den cual Hulanda por sigui tin un rol prominente. Pa Secretario di Estado Szabó, e concepto di zelfredzaamheid (autosuficiencia) ta crucial: un Aruba cu ta para riba su mesun pia den un cooperacion igual cu Reino Hulandes, basa riba fortalesa socio-economico.
Como parti di e tema di autosuficiencia, Prome Minister Eman a invita Secretario di Estado Szabó pa un bishita na Museo Arkeologico Nacional, caminda a presenta un aspecto profundo di e identidad Arubano. Arkeologo drs. Raymundo Dijkhoff a guia e presentacion y a pone enfasis riba e historia di un pueblo cu a sobrevivi y progresa riba su mesun forsa, desde tempo precolonial te cu presente.
A pone enfasis riba e mentalidad di esfuerso, unidad y amor cu a pone nos antepasadonan indjan, cosecha riba tera seco y pisca riba lama bruto. Esaki ta e mentalidad cu ta biba den e pueblo Arubano pa hopi generacion. E amor pa nos baranca y orguyo ta parti integral di e alma nacional. Esaki hustamente tabata e mensahe poderoso cu Sr. Szabó a haya durante su bishita.
Gabinete AVP-Futuro ta considera e bishita manera un paso positivo den direccion di renobacion, respet y cooperacion entre Aruba y Hulanda.
