ORANJESTAD – E hoben C.H. (19) a presenta dilanti Hues pa scucha su sentencia. E ta wordo acusa di a purba mata dos hende door di tira riba un auto.
ARUBA NATIVE por a compronde cu Fiscal a exigi 7 aña di prison pa C.H., kende Fiscal ta haya culpabel di purba mata dos hende. Hues ta haya C.H. culpabel pero a baha e castigo exigi pa Fiscal .
TIRAMENTO DEN DIA CLA
Dia 6 di Maart 2025 tratamento di e caso a tuma lugar caminda Fiscal a bisa cu dia19 Juni 2024 mas o menos 2’or di merdia, 2 miembro di team di narcotica a mira con dos hoben cu flanel bisti tabata lucha cu un homber lomba sunu y despues nan a core bay. E homber lomba sunu a subi su auto y core nan tras. No mucho leu, a scucha tiro. E agentenan a bisa cu nan a mira C.H. ta core cu un revolver den man. Na opinion di Fiscal, camera di seguridad ta mustra cu ningun momento e glas di e auto, en especial na parti di chofer, a baha. Fiscal a sigui bisa cu C.H. a tira riba e auto y herida e dama Hulandes D. na man. C.H. a tira dirigi y esey a causa cu e dama D. a resulta herida. Fiscal ta considera esaki, cu C.H. a purba mata. Fiscal ta haya legalmente proba cu C.H. a purba mata e dama D. y un homber cu a keda desconoci. Na opinion di Fiscal den e caso aki no por bisa cu C.H. a actua den defensa propio. E ta haya C.H. culpable di posecion di un revolver Caliber 38.
Fiscal a exigi 7 aña di prison.
HUES TA PREOCUPA
Hues den su sentencia a bisa cu C.H. a admiti pero abogado mr. Hernandez a haci apelacion riba defensa propio. Segun e abogado, e chofer di e auto a baha glas di e auto y kier a tira riba C.H. E momento ey C.H. a tira.
Hues a bisa cu e no ta kere e storia ey. Segun Hues riba camera di seguridad, no ta mira cu e glas di auto tabata habri y hasta e parti cu C.H. ta bisa cu e auto tabata tras di un mata, e periodo tabata mucho cortico. Hues ta haya C.H. culpable di a purba mata dos hende. El a bisa cu e dama Hulandes a resulta herida na su braza. Hues a sigui bisa cu ademas C.H. ta culpable di tabatin un arma.
Hues ta haya cu C.H. no tin respet pa bida di hende. Hues a bisa cu e ta preocupa con C.H. ta cana cu arma rond. El a bisa cu abogado a pidi pa aplica ley hubenil, mirando cu net C.H. a cumpli 19 aña. Hues a bisa cu e no ta mira motibo pa haci esey.
CASTIGO
Hues a bisa cu e ta tene cuenta cu ta promer biaha cu C.H. ta cay cera. Tambe Hues a bisa cu C.H. ta jong y mester dun’e chens pa drecha su bida. Hues a condena C.H. na 5 aña di prison, kitando e tempo cu e ta cera den KIA.
