33
Mundo di deporte local mester di mas hoben profesional
Siman pasa diaranson durante un anochi placentero y interactivo, Comite Olimpico Arubano (COA) a participa den un sesion di orientacion organisa door di Mon Plaisir College Havo/VWO. Aki tur studiante cu ta den proceso di eligi nan pakete pa “bovenbouw”, a ricibi informacion di diferente profesional cu a splica di nan ramo di trabou y profesion.
Den e caso di COA, Sra. Nicole Hoevertsz a presenta como Secretaria General di COA y Vice Presidente di Comite Olimpico Internacional (IOC), a elabora riba e diferente tareanan di un profesional cu ta traha den e mundo di deporte. Aunke tur hende conoce COA como un instituto di deporte cu ta percura pa delegacionnan di atletanan representa Aruba den e diferente weganan den un ciclo Olimpico, hopi no ta conoce cantidad di trabou cu ta pasa na diferente nivel pa logra esaki. Banda di e participacion deportivo, tambe a splica e cantidad di otro tareanan importante cu COA tin, manera promove e balornan olimpico, capacita e dirigentenanan di nos federacionnan local y desaroyo general di deporte na Aruba. Tur esaki ta posibel solamente si tin suficiente hende capacita y motiva pa yuda cu e procesonan aki, pues semper tin mester di mas profesional den e mundo di deporte.
Finalmente, a duna espacio na e grupo di hoben pa haci cualkier pregunta nan tin, y a base di e gran cantidad cu a ricibi,a constata cu e interes den nos mundo di deporte ta grandi. Tur hoben cu a participa durante e sesion cu COA, a ricibi un pin pa asina corda riba e balornan Olimpico cu por wordo aplica na tur cos den bida; Amistad, Respect y Excelencia. #TEAMARU
