ORANJESTAD – Diabierna Prome Minister Evelyn Wever-Croes a sigui cu su bishitanan tradicional na scolnan na Aruba den cuadro di Dia di Himno y Bandera. Riba e mainta aki Prome Minister, acompaña pa Minister di Cultura, Xiomara Maduro a bishita Pius X School na Dakota.
Prome Minister a ricibi un caluroso ‘Bon Bini’ di e muchanan cu a ricibi’e cu un sonrisa dunando inicio na e mainta aki. Aki Prome Minister a haya e oportunidad pa combersa cu e muchanan di klasnan 6 y despues a sigui un momento unda e muchanan por a haci pregunta na e mandatario y asina haya sa mas di nos Dia di Himno y Bandera.
E mandatarionan por a mira den e klasnan 6 un proyecto cu e alumnonan a traha riba dje unda nan por a escoge Rubianonan cu logronan grandi. Prome Minister a expresa cu un proyecto asina ta importante pasobra cada un di e Rubianonan aki ta un inspiracion pa e alumno y asina e alumno sa cu e tambe por tin logronan grandi den su bida.
Prome Minister a expresa cu e ta hopi contento cu e charla cu e tawatin cu e muchanan. E por a sinti na e muchanan con grandi nan amor ta pa Aruba. El a splica nan: “Ora bo ta stima Aruba bo kier pa Aruba bay bon. Esey kiermeen bo mester haci bo best na scol y semper aspira pa ta e miho version di bo mes den tur loke bo ta haci. Asina bo ta hiba bo mes y Aruba padilanti”.
Prome Minister a gradici Pius X School pa inculca den e muchanan e importancia di nos propio hendenan. “Danki pa ricibi mi y duna mi e oportunidad pa comparti cu e alumnonan e mainta aki. E muchanan ta bon prepara pa celebra Dia di Himno y Bandera. Mi por mira cu nan tin un amor grandi pa Aruba y pa su himno y bandera”, Prome Minister a expresa.
