ARUBA- 13.03.2025. Cuminsando diabierna 14 di maart e prome invitacionnan pa participa na e investigacion “Kico nos ta come” lo cuminsa yega e diferente hogarnan na Aruba. Manera DVG a informa anteriormente entre 24 di maart cu 30 juni 2025 Departamento di Salud Publico den colaboracion cu IBISA, CBS y WEB Aruba N.V. lo bay ta eherciendo un Total Diet Study (TDS) cu ta un estudio total, cientifico pa por haya informacion di nos comunidad riba producto y alimentonan mas consumi na Aruba y analisa e resultado di esaki cu malesanan cronico manera diabetes, presion halto y obesidad.
Pa cu e encuesta aki 500 adres a wordo selecciona pa CBS, reparti rond di ful Aruba. E 500 adresnan selecciona lo bay ricibi un carta den nan postbus cu e invitacion pa partisipa na e investigacion “Kico Nos Ta Come?”. Den e dianan cu ta sigui un encuestador lo pasa na e casnan cu a haya e invitacion pa selecciona den e cas un persona pa participa. Na e encuesta aki por participa solamente ciudanonan cuminsando for di 18 aña bay ariba y tur datos ta keda anonimo.
E studio aki ta consisti di 2 parti:
- un survey (pregunta) di kico nos ta come. Pa cu e parti aki e encuestador lo pasa na e cas na 2 ocacion pa haci diferente pregunta.
- un estudio di laboratorio pa e parti quimico. Abase di resultadonan di e survey “Kico nos ta come” WEB Aruba N.V. lo haci investigacion riba e productonan mas usa y consumi.
E implementacion di e TDS ta importante pa diferente motibo:
1.) E estudio ta hunga un rol crucial pa locual ta safety di nos cuminda. Door di investiga sistematicamente ki substancia nos ta ingeri door di nos alimento,pa nos por identifica e riesgo na tempo y ajusta maneho.
2.) Ademas, e estudio ta duna informacion valioso pa esnan cu ta responsable pa desaroya maneho y pa e industria di alimento. E resultadonan ta juda pa tuma decisionnan informa tocante safety di nos alimento, y nan produccion.
3.) e tin influencia riba educacion di e consumidor. Door di duna informacion tocante lo cual realmente tin den nos cuminda, nos lo por tuma decisionnan mas informa y consciente pa locual ta nos salud y bienestar.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]
