Diabierna ultimo Minister Arends, encarga cu e cartera di naturalesa a tene un conferencia di prensa unda a informa pueblo cu Serlimar ta riba un caminda di transformacion fundamental pa fortifica su posicion como e empresa principal pa coleccion di desperdicio na Aruba. Atraves di mehoramento continuo y adaptacion na maneho, desaroyonan economico y ambiental, Serlimar ta comprometi cu un sistema di maneho di desperdicio mas eficiente y sostenibel.
For di su establecimento na 2005, Serlimar a enfoca riba coleccion y maneho di desperdicio segun regulacionnan medioambiental vigente. Gobierno di Aruba a dirigi e trabounan di Serlimar via un contrato di Suministro di Servicio (DVO) y plus contribucion financiero liga cu esaki. Den e ultimo añanan, Serlimar a logra mehora considerablemente su situacion financiero. Sinembargo, tin hopi mas oportunidad pa implementa un diciplina financiero mas fuerte.
Serlimar su vision ta enfoca riba crea un sistema di maneho di desperdicio moderno, basa riba:
- Un servicio di coleccion confiabel y eficiente pa tanto casnan como negoshinan.
- Un modelo di operacion autosuficiente cu tarifanan ahusta na costo operativo.
- Un compromiso cu sostenibilidad pa crea un Aruba mas limpi y responsabel.
Durante e conferencia di prensa Minister Arends a presenta e cinco pilar strategico pa transformacion. Pa logra Serlimar su meta di eficiencia y sostenibilidad, Serlimar mester traha riba cinco pilar di desaroyo:
- Reforma di Ley Estatal
Serlimar ta propone un revicion di e ‘Landsverordening 2005’ pa ahusta e regulacionnan cu ta restringi su capacidad di opera manera un empresa comercial autosuficiente. - Un Empleado, Un Empresa
Implementacion di un maneho di HR moderno cu ta enfoca riba optimisacion di personal y mehoramento di eficiencia laboral. Un gran porcion di empleadonan gubernamental a eligi pa uza e plan di VUT, resultando den un reduccion di 19% di personal. - Coleccion di Desperdicio como Negoshi Principal
Enfoke riba e core business: coleccion y maneho di desperdicio pa asegura un servicio confiabel y constante. Serlimar ta traha den colaboracion cu Ecogas, cu a tuma responsabilidad di maneho di Seroe Teishi desde 2020. - Diciplina Financiero
Maneho financiero efectivo ta crucial pa autosuficiencia. E strategianan ta inclui:- Coleccion di fracturan un prioridad.
- Tarifa ahusta riba gasto real.
- Transparencia den cifranan financiero.
- Solucion Definitivo pa Parkietenbos
Un plan di sanacion ta den ehecucion, Parkietenbos ta keda cera pa desperdicio di cas y comercial. E prome fase di sanacion a caba den 2023, y e sanacion di asbestos ta aproba pero ta warda hindervergunning pa inicia. Un muraya pa cera e tereno ta den ehecucion. Eliminacion di e backlog di desperdicio medico y carcas ainda no a cuminsa y ta rekeri atencion urgente. Aunke tin dialologo, e acuerdonan cu AWSS ainda mester wordo formalisa.
For di cifranan compara cu esunan ora di trata e ley na 2019, e costo pa Serlimar opera na 2024 ta 6 miyon menos cu loke a premira na 2019. Pues por conclui cu a stabilida e compania y awor tin un miho bista di kico mester haci. Tambe por mira cu e ganashi di Serlimar den añanan anterior ta primordialmente bini for di un DVO mas halto, pues e compania mes no ta esun cu tabata generando e entrada sino via e DVO cu pueblo ta paga. Cambio drastico a bin den esaki unda cu actualmente contirbucion di Gobierno a baha y Serlimar mes ta generando 45% di loke e mester. Desde cu a sali for di surseance, Serlimar ta trahando pa ta up to date cu jaarrekening cu no a wordo haci desde 2019. Poco poco pero sigur Serlimar lo logra funciona manera tur otro compania, na un froma sostenibel y responsabel.
Serlimar ta traha riba eliminacion di deficiencia financiero den su operacion pa logra autosuficiencia. Entre e opcionnan pa genera mas ingreso ta:
- Expande su servicionan na mas clientenan comercial.
- Optimisa e proceso di cobransa di clientenan residencial.
- Introduci un sistema di Extended Producer Responsibility (EPR).
- Haci acuerdonan cu AWSS pa distribucion di ingreso.
- Combina entidad legal.
Serlimar ta den un proceso di transformacion crucial cu tin un impacto profundo riba e calidad di bida di nos comunidad y e sostenibilidad di nos isla. Gobierno di Aruba ta logra rescata Serlimar pa awo e compania por enfoca riba un Aruba mas limpi, un Serlimar mas fuerte y un futuro mas sostenibel pa tur habitantenan.
