ORANJESTAD, Aruba – 4 di maart, 2025: Diabierna anochi 28 di februari tabata tin e sorteo miyonario tan espera di Mini Mega y Mega Plus cu e jackpot record di 4 miyon 350 mil florin. E numbernan ganado cu a sali e anochi ey ta: 05-11-29-30 y e Mega Ball: 03 y manera e resultado a wordo procesa a bin haya sa cu tin 1 solo ticket ganado cu a gana e jackpot completo di Mini Mega y Mega Plus di 4 miyon 350 mil florin y a wordo bendi na Mahuma Lottery & Snack.
Awe diamars 4 di maart, Aruba ta sera conoci cu e feliz miyonario di Aruba cu Lotto, e loteria di Aruba. E feliz ganado a presenta na oficina di Lotto na Paardenbaaistraat 10 pa asina cobra e premio grandi aki cu el a gana cumprando su numbernan vast.
Kingsley a conta cu el a ripiti su numbernan vast y e numbernan aki tabata e numbernan ganado pa e sorteo multi-miyonario di Mini Mega y Mega Plus.
E mesun anochi aki tambe Mini Mega a conoce 12 feliz ganado di e segundo premio. Cada ganado a gana Afl. 5.766,- y e ticketnan ganado a wordo bendi na e siguiente lugarnan: Key Lottery 2, Mabon Lottery & Snack, Mama Trida Lottery, Lucky Angel, J’s Lottery, Lucky Dragon 2, Mega Jackpot Paradera, Mariella Lottery, Black Pussy, Cura Cabay Lottery, Sand-Rock Lottery – P.H. straat I y Lucky Mac.
Lotto, E Loteria di Aruba tin diferente wega, Catochi, Big 4, 1-OFF, Zodiac, Wega di Number di Korsou di Lotto, Lucky 3, Multi-X, Lotto di Dia, Lotto 5, Mini Mega y cu su Mega Plus y e diferente weganan di Raspa y Gana y Instacash. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
