ELMAR: Bo tin tent riba ruta di carnaval? Si e lona bula y alcansa liña di coriente, e consecuencia por ta grave

Oranjestad – 26 februari 2025 – ELMAR ta pidi atencion di tur esnan cu tin tent riba ruta di carnaval; no mishi cu e tent ni e lona of tarpolin den caso cu esaki bula y alcansa liñanan aereo di coriente. Segun Departamento Meteorologico, nos ta den un siman di biento fuerte te duro den rafaga (wind knots). Esaki ta un peticion importante pa preveni peliger pa bida di hende.
Ban goza di nos carnaval cu seguridad den mente. Pa preveni interupcion di coriente y riesgo pa bida di hende, recorda:
● Instala bo tent na un manera stabiel pa evita cu e lona of tarpolin di e tent bula y alcansa liñanan di coriente.
● Ora bo bandona e sitio, kita e lona of tarpolin di e tent pa baha e riesgo di peliger.
● Si e lona of tarpolin di tent alcansa liñanan di coriente, no mishi cu e tent ni e lona of tarpolin, esaki por pone bida di hende na peliger.
Pa garantisa un carnaval sigur pa tur hende, ta crucial pa cumpli cu e reglanan aki. Si mester asistencia, por fabor tuma contacto cu ELMAR su Storingsdienst na 523-7147.
Laga nos celebra cu bon energia, pero tambe cu seguridad!