Oranjestad-Aruba
Awe polis a detene varios persona relaciona cu incidentenan di violencia cu a sucede riba 15 di februari ultimo durante Jouvert.
E incidentenan di violencia aki, cu ta inclui violencia publico, agresion y un tiroteo, tabatin di haber cu rivalidad entre gangs.
Den e cuadro ey polis tabatin anteriormente dos persona den detencion caba.
Ministerio Publico y polis ta decidido pa garantiza seguridad den Carnaval 71.
Polis tin e tarea di mantene ordo y lo haci tur esfuerzo pa asegura cu e festividadnan sigui sin contratiempo.
Pesey cu a tuma diferente medida desde principio, incluso e controlnan preventivo (preventief fouilleren) cu ya caba ta andando.
E seguridad di tur participante, di publico en general y di muchanan en particular ta primordial.
Ministerio Publico y polis ta traha hunto den colaboracion estrecho pa make sure cu tur hende por gosa di Carnaval na un manera sigur y placentero.
Recherche ta trahando intensivamente riba e investigacion di e incidentenan di violencia, y no ta descarta mas detencion.
E sospechosonan lo wordo presenta dilanti huez. E lo dicidi si nan mester keda den detencion preventivo pa mas tempo.
