Oranjestad – E añanan pasa, Aruba a logra surplusnan presupuestario considerabel, y a baha e ratio di debe. E desaroyonan aki ta positivo, sin embargo, Colegio di supervision financiero di Aruba (CAft) ta enfatisa cu awor e pais mester probecha e oportunidad pa implementa reformanan y pa mehora e control di riesgonan. Esaki ta necesario pa garantisa e finanzas gubernamental y e resiliencia economico di e pais. E fundamento bao di e crecemento economico espectacular ta fragil, pasobra pa gran parti e pais ta depende di turismo.
Impuestonan
A pesar cu aña tras aña Aruba ta mustra ingresonan di impuesto creciente, segun CAft ta necesario – precisamente awor – pa actua prudente y controladamente. Aruba ta progresando den direccion di finanzas gubernamental duradero, aunke e fundamento ta fragil. Segun Fondo Monetario Internacional (IMF), desde 2025, e crecemento economico lo normalisa. Esaki ta significa cu e ingresonan di impuesto lo no sigui crece den e medida aki automaticamente. A pesar cu den e añanan pasa a duna pasonan pa crea un sistema mas robusto, e sistema ainda ta fragmenta y complica. CAft ta bolbe conseha pa investiga e posibilidad di simplifica e sistema introduciendo un sistema di btw, loke tambe ta beneficia compliance. Ademas, CAft ta urgi pa revisa criticamente e deduccionnan pa asina amplia e base imponibel. Asina tambe ta crea espacio pa bahada di tarifa.
E sector informal, manera e vacation rentals – cu segun IMF ta representa 15 porciento di e bbp – ta mina compliance. Refuerso di Servicio di Impuesto ta esencial pa garantisa e ingresonan di impuesto, considerando e sistemanan anticua y e falta di bista riba cumplimento tributario. Un miho cooperacion cu Aduana y Banco di Seguro Social, incluyendo intercambio di datonan, por mehora cumplimento y combati fraude. Banda di esey, CAft ta enfatisa cu cobro centralisa di primanan y impuestonan pa Servicio di Impuesto por tin beneficionan considerabel.
Brecha den legislacion y regulacion
CAft ta urgi Aruba pa cera e brecha den legislacion y regulacion arubiano cu a descubri recientemente, cu ta trata di e autoridad di Minister di Finanzas pa independientemente ahusta (reduci) impuesto riba salario y impuesto riba entrada. Segun interpretacion di CAft, akinan ta falta e ‘checks and balances‘ adecua, pasobra modificacionnan na e banda di gastonan mester di aprobacion previo di Parlamento, mientras pa e banda di ingresonan esaki ainda no ta suficientemente garantisa.
Ciclo di presupuesto y hustificacion
Un presupuesto debidamente stipula ta forma e base pa bon maneho financiero. E falta di un presupuesto stipula pa 2025 no solamente ta limita Parlamento den su tarea di control, sino e tambe tin consecuencianan directo; sin presupuesto stipula, Gobierno di Aruba no por contrata prestamonan nobo. Esaki ta problematico, pasobra na 2025, Aruba tin un deber di amortisacion di aproximadamente AWG 400 miyon. Sin embargo, ainda no a planifica tratamento di e presupuesto. P’esey, CAft ta urgi Aruba pa yega na un presupuesto stipula pa 2025 cu urgencia. Conseho di Minister di Reino tambe a urgi Aruba pa percura cu esaki sosode. Aruba tin hopi retraso den e entrega di e informacion di hustificacion. Ainda no a ofrece e cuenta anual pa 2019 na Parlamento.
Resiliencia
A pesar cu e ratio di debe di Aruba a baha te aproximadamente 70 porciento di e bbp na 2024, e pais ta keda vulnerabel pa shocknan economico. Ademas, ta anticipa cu na 2025, e gastonan di impuesto lo representa 17 porciento di e presupuesto. Reduccion di debe continua ta esencial pa absorbe shocknan den futuro. Banda di esey, e progreso di e palabracionnan cu Hulanda tocante di un marco di supervision nobo (ley di reino) ta duna perspectiva riba gastonan di interes mas abao y mas espacio financiero pa inversionnan.
