ORANJESTAD – Diabierna 21 di februari, a tuma luga un Conferencia di Prensa di Gobierno di Aruba unda Prome Minister Demisionario, Evelyn Wever-Croes a informa riba dos decision importante pa Aruba cu a wordo tuma awe mainta durante Conseho di Minister di Reino (Rijksministerraad).
A trek in e ley di RAft
E prome ta trata di e bon noticia cu Conseho di Minister di Reino a dicidi di trek in e ley di RAft (Rijkswet Aruba financieel toezicht). Prome Minister ta indica cu e Raft tawata e condicion cu Hulanda a pone pa por a yuda Aruba atravesa e pandemia. E tempo ey Gobierno tawata sa di principio cu esaki no tawata bon pa Aruba y desde e momento ey a cuminsa negocia riba dje y awe a logra kita e ley aki for di mesa.
Deadline Presupuesto 2025
E di dos decision cu Hulanda a tuma awe mainta ta uno menos bon pa Aruba. Ta trata di e decision cu Conseho di Minister di Reino pa pone Aruba riba un deadline pa trata Presupuesto 2025. E deadline pa esaki ta 31 maart 2025. Prome Minister ta remarca cu e decision aki ta di lamenta ya cu durante su gabinetenan, Gabinete Wever-Croes 1 y 2, nunca Aruba a haya su mes den un situacion similar.
“E ta un situacion di e presupuesto cu por a wordo evita y awor Aruba ta haya su mes cu un instruccion di un deadline di Rijksministerraad. Durante e ultima añanan, nos semper a percura pa entrega presupuestonan na tempo pa asina wordo trata na tempo. Ta di lamenta cu e Presupuesto 2025, ta cayendo laat”, Prome Minister a indica
