Oranjestad, 20 februari 2025 – Minister di Asunto Economico, Geoffrey Wever, recientemente a tene un reunion cu Aruba Fair Trade Authority (AFTA) tocante e ley nobo pa proteha consumidornan, riba cual Raad van Advies a duna recientemente nan conseho. Aworaki e ley ta sigui su trayecto pa ser entrega na Staten.
Como cu proteccion di consumidor ta un di e pilarnan di Aruba Fair Trade Authority (AFTA), na october 2023 Minister Geoffrey Wever, a haci peticion na Hulanda por medio di Landspakket, pa aloca fondonan pa traha riba e ley di ‘consumentenbescherming’ y inclui proteccion di consumidor bou di responsabilidadnan di AFTA. E proceso pa selecta un experto pa traha riba e ley di ‘consumentenbescherming’ a inicia na final di 2023. Y na final di 2024, riba peticion di Minister Wever, conseho di minister a aproba pa e ley aki sigui e trayecto y finalmente wordo trata den Parlamento di Aruba.
Concretamente, e tareanan y autoridad adicional di AFTA den cuadro di proteccion di consumidor ta encera: supervision di e cumplimento cu e ley di proteccion di consumidor y duna informacion tocante e derecho y deber di consumidornan haciendo uzo di un loket di informacion digital.
Despues cu e ley wordo aproba den Parlamento di Aruba, AFTA lo ta responsabel no solamente pa stimula un competencia husto den nos mercado pero tambe lo contribui na educa consumidornan riba nan derechonan y proteha e consumidornan contra practicanan inhusto den comercio.
Minister Geoffrey Wever ta contento cu e progreso den e ley cu ta bai protehe e derechonan di e consumidornan. “Proteccion di consumidor ta esencial pa un economia moderno. Pronto e ley lo wordo trata den Parlamento di Aruba. AFTA ta fungi un rol esencial den proteccion di consumidornan y creacion di un mercado transparente y husto.”
