ORANJESTAD – Awe mainta Corte a trata e caso penal cu Ministerio Publico a cuminsa contra e homber Dominicano biba na Aruba, J.D.L.S.P. (50). E ta wordo acusa di intento di mata un otro Dominicao P.F. riba 8 Juni 2024.
ARUBA NATIVE por a compronde cu Fiscal ta haya J.D.L.S.P. culpabel di intento di mata y a exigi 3 aña di prison. Despues di tratamento di e caso, Hues a dicta sentencia y a baha e castigo exigi pa Fiscal.
Fiscal a acusa J.D.L.S.P. cu riba 8 Juni 2024, el a purba mata e homber Dominicano P.F. cu machete.
DAL CU MACHETE RIBA CABEZ
Hues a mustra cu for di e relato di Polis, por compronde cu e homber P.F. a menaza J.D.L.S.P. cu morto y cu e lo mata J.D.L.S.P. su yiu muher y su mama. Hues a mustra cu tin video di e confrontacion formal dilanti di un supermercado na San Nicolas. Hues a bisa cu ta J.D.L.S.P. a bay riba P.F. cu un machete y un palo den man. Segun J.D.L.S.P., ta P.F. a bay riba dje cu un bate di beisball y J.D.L.S.P. a bay den su auto y pasa man pa un machete y un pida palo. Segun J.D.L.S.P., ora P.F. a menace via whatsapp, el a bay Polis pa haci denuncia pero Polis no a haci nada.
Un dia despues di e menaza, ora cu J.D.L.S.P. tabata hiba su hefe y un colega cas, el a pasa dilanti di un supermercado na San Nicolas y a baha su hefe cu ta biba ey banda mes. Ora e tabata bayendo pa hiba su colega, e colega a bis’e cu P.F. ta na e supermercado. J.D.L.S.P. a bisa cu el a bay na e supermercado pa mira kico P.F. su intension tabata pasobra e no tin ningun problema cu P.F.
Hues a remarca cu si J.D.L.S.P. a baha cu machete den man, con e kier regla un problema! J.D.L.S.P. a bisa Hues cu ora el a para e auto y baha, el a mira cu P.F. tabatin un bate di baseball den man ta warda J.D.L.S.P. yega. Hues a bisa cu tin imagennan di video di seguridad caminda J.D.L.S.P. y P.F. a enfrenta otro. Segun J.D.L.S.P., ta P.F. a dal’e promer cu bate riba su cabez. Ora el a mira sanger, el a perde cabez y a ataca P.F. cu e machete. Hues a bisa cu riba video por mira cu J.D.L.S.P. tabata zwaai cu e machete den direccion di P.F. Segun J.D.L.S.P., e no tabata conciente e momento ey kico e tabata haci. El a bisa Hues cu ora el a mira cu P.F. tabata sangra y cu e mes tabata sangra, el a stop y bay den su auto y bay hospital pa haya ayudo.
Hues a bisa cu segun P.F., ta J.D.L.S.P. a atak’e.
Hues a mustra cu segun e raportnan medico, P.F. a sufri un kap di 20 cm riba cabez cu mester a hiba 15 cosi. J.D.L.S.P. tabatin un kap di 3 cm ariba su cabez.
Ta asina cu Polis a check e cellular di P.F., caminda a haya menaza cu P.F. a manda pa J.D.L.S.P.
Hues a puntra Fiscal con a para cu P.F. Fiscal a bisa cu P.F. a wordo persigui te cu el a wordo condena na 4 luna di prison pa maltrato cu arma. J.D.L.S.P. a bisa Hues cu P.F. a keda 2 luna sera y despues a wordo deporta.
Hues a bisa cu 8 Juni 2024, J.D.L.S.P. a wordo deteni y e tin 8 luna sera. J.D.L.S.P. a bisa Hues cu e ta mantene su mama na Santo Domingo. Na yoramento el a bisa cu su mama (83) a sufri un atake di sucu y ta na cama. El a bisa cu e no por yuda su mama cu medicamento pasobra e ta sera.
FISCAL A EXIGI 3AÑA DI PRISON
Fiscal a bisa Hues cu ta un hecho cu J.D.L.S.P. y P.F. a ataca otro caminda J.D.L.S.P. a dal P.F. cu machete riba cabez. Fiscal a sigui bisa cu e pregunta ta si esaki ta intento di mata of maltrato severo. Na opinion di Fiscal, J.D.L.S.P. a tuma e riesgo cu e por a mata P.F. Fiscal ta haya cu J.D.L.S.P. a dal P.F. cu forza riba su cabez cu un machete. Fiscal a bisa cu e cabez ta un parti sensible di bo curpa. Esaki por a causa morto di P.F. El a mustra cu e victima a sufri un corta di 20 cm largo, cual ta hopi grandi. E ta haya cu intencional J.D.L.S.P. a dal P.F. cu machete. El a bisa cu J.D.L.S.P. a bisa cu el a defende su mes contra P.F. cu tabatin un bate beisball y a dal’e riba su cabez. Fiscal ta haya cu e amenazanan di P.F. tabata hopi serio pero esey no ta duna e derecho pa ataca y papia di defensa propio. Fiscal a mustra cu J.D.L.S.P. a pasa dilanti e supermercado, para auto riba caminda y sali cu un machete den man y pasa man pa un pida palo. Nan a ataca otro y J.D.L.S.P. a dal P.F. cu machete riba cabez. Fiscal a bisa cu e no ta haya cu J.D.L.S.P. a actua den defensa propio. Fiscal ta haya cu ta J.D.L.S.P. a causa e confrontacion. Na opinion di Fiscal, J.D.L.S.P. por a sigui core bay y no baha for di e auto arma. E ta considera esaki un intento di mata. Fiscal a tene cuenta cu J.D.L.S.P. ta un “first offender” y cu el a wordo menaza. Fiscal a exigi 3 aña di prison di cual 1 aña y 6 luna ta condicional cu 3 aña di prueba.
DEFENSA DI ABOGADO
Mr. Emerencia a bisa Hues cu su cliente a wordo amenaza cu morto. El a cuestiona e hecho cu J.D.L.S.P. a bay haci denuncia di menaza na Polis y Polis no a haci nada. E abogado ta haya cu Hues mester tene cuenta cu e situacion emocional cu J.D.L.S.P. tabata aden. E abogado a mustra cu ta diferente biaha P.F. a menaza J.D.L.S.P. cu morto. El a bisa Hues cu P.F. a whatsapp J.D.L.S.P. cu e ta arma y cu e lo usa esaki contra J.D.L.S.P. y su famia. E abogado a bisa Hues cu e menaza aki a keda traha riba J.D.L.S.P. Henter dia e tabata cana cu e pensamento cu P.F. a menace cu morto. E abogado a splica cu J.D.L.S.P. a pasa dilanti e supermercado pa bay baha su hefe na un cas y despues a hiba un otro colega pa su cas. Despues di a baha su hefe y a bolbe pasa dilanti e supermercado, e colega a bis’e cu P.F. ta na e supermercado. J.D.L.S.P. a dicidi cu e ta bay confronta P.F. pa wak kico ta su intension. E abogado a mustra cu ora J.D.L.S.P. a para su pick up, P.F. a coy un bate di beisball y a bay riba J.D.L.S.P. Na opinion di mr. Emerencia, esey tabata motibo cu J.D.L.S.P. a coy e machete. E abogado a mustra cu promer ta J.D.L.S.P. a wordo herida cu bate di beisball na cabez. Despues J.D.L.S.P. a dal P.F. cu e machete na cabez. Mr. Emerencia a cuestiona e hecho cu P.F. no a wordo condena pa intento di mata sino maltrato severo siendo cu P.F. a tuma e riesgo cu J.D.L.S.P. por a fayece di e sla di e bate di beisball. E abogado ta haya cu no por papia di intento di mata pasobra J.D.L.S.P. no tabatin intension di mata. Abogado ta haya cu mester tene debido cuenta cu e menaza serio di P.F. Mr. Emerencia a remarca cu P.F. cu a menaza cu morto y a maltrata J.D.L.S.P. ta haya 4 luna so di prison y Fiscal ta exigi pa J.D.L.S.P. 36 luna di prison. E abogado a pidi Hues pa duna J.D.L.S.P. castigo igual na loke el a sinta cu un tempo di prueba largo.
SENTENCIA
Hues a sera tratamento di e caso y a dicta sentencia di biaha. Hues a bisa cu J.D.L.S.P. a usa violencia. Tin video di seguridad cu ta mustra tur cos. Na opinion di Hues, J.D.L.S.P. a dal P.F. cu machete cu forza riba cabez. Hues ta considera esaki como intento di mata. Hues a sigui bisa cu e pregunta ta si J.D.L.S.P. tabata den un situacion cu e mester a defende su mes. Hues no ta haya cu J.D.L.S.P. tabata den un situacion cu e mester a defende su mes. Hues ta haya cu ta J.D.L.S.P. mes a busca e situacion aki. El a mustra cu J.D.L.S.P. a pasa den auto dilanti di e supermercado y a para y bay riba P.F. Hues ta haya cu J.D.L.S.P. mester a sigui core bay y evita confrontacion di P.F.
Pa cu e castigo, Hues a bisa cu e ta tene cuenta cu ta promer biaha cu J.D.L.S.P. ta cay sera pa un delito serio asina. Tambe Hues a tene cuenta cu e menazanan serio di P.F. y cu J.D.L.S.P. a dal P.F. cu machete riba cabez. Hues a bisa cu esaki por a causa P.F. su morto y J.D.L.S.P. lo por ta dilanti Hues pa a mata. Hues a condena J.D.L.S.P. na 24 luna di prison di cual 8 luna condicional cu 3 aña di prueba.
