Prome Minister Evelyn Wever-Croes:
ORANJESTAD – Prome Minister Evelyn Wever-Croes a splica cu na momento cu Gabinete Wever-Croes a drenta gobernacion na 2017, e situacion tabata uno deplorabel. No solamente Bestuurskantoor tabata den un estado desastroso, sino e Gobierno nobo no a haya literalmente nada pa por cuminsa funciona. No tabata tin ningun documento, y e sistema di computer a wordo sabotea di manera cu no por a haya nada den e memoria pa sa kico tabata andando. Pa por a cuminsa funciona, Gobierno mester a acerca cada departamento pa asina nan duna un indicacion di kico ta loke tabata tin pendiente.
Contrario na e Gabinete anterior, Gabinete Wever-Croes si lo laga tur cos “netjes” atras. Durante e 7 añanan di gobernacion tur informacion a wordo bon documenta y lo keda atras, pa asina semper tin un historia di tur documentacion facilitando e traspaso di trabou di un Gobierno pa otro. Tambe tur documento fisico, por wordo haya na Bureau Interne Diensten (BID).
Prome Minister a indica cu tambe ta hopi importante pa traha un lista di kico tur tin pendiente. Por ehempel e negosiacionnan cu Hulanda, na unda tin “deadlines” pa cumpli cu ne.
Un combersacion cu Prome Minister tabata tin durante su biahe na Hulanda ta riba e conseho cu Raad van State a emiti. Raad van State a traha un conseho di con nan ta kere cu e paisnan den Reino por duna mas contenido na e deficit democratico cu tin den Reino. Prome Minister a haci un palabracion cu Secretario di Esatdo Zsolt Szabó cu prome cu 15 di mei lo tin un “position paper” di Aruba. Y tur esaki ta bay bin den un documento indicando e “deadlines”, den ki fase e ta y ken ta encarga cu ne pa asina cualkier Gobierno cu bin sa con pa continua.
Prome Minister a expresa cu e documentonan aki, lo yuda grandemente e siguiente persona cu lo bay ocupa e posicion di Prome Minister, despues di Gabinete Wever-Croes. E persona aki no mester bay busca informacion niun caminda pa por cuminsa eherce su trabou, mirando cu tur cos ta wordo laga atras p’e. Tambe Prome Minister a pidi tur minister pa traha riba e documentacionnan necesario pa entre otro traspaso. Hasta Minister Geoffrey Wever, cu tin chens di sigui den su posicion den un Gobierno nobo, lo mester tin tur documento di transicion cla. Di e manera aki lo cera e Gobierno di Gabinete Wever-Coes II na un manera profesional y responsabel.
