Desde aña 2023 Horacio Oduber Hospital ta comparti cu comunidad mensualmente cifranan encuanto admision, departamentro di emergencia, cuanto operacion ta tuma luga y mucho mas. Esaki ta brinda transparencia y claro ta reenforsa confiansa entre dunado di cuido y su clientenan/pashentnan. Alabes no por keda sin menciona cu data di nos Hospital ta duna un miho bista na nos partners tocante servicionan duna pa asina por planea miho pa e siguiente aña unda pa aloca eficientemente servicionan medico. Alabes ta comparti banda di cifra di 2024 tambe di 2023 cu 2022 pa duna un miho bista y alabes por compara cu añanan anterior.
Admision na HOH
Na aña 2024 tabatin un total di 10.041 pashent cu a wordo admiti compara cu 2023 cu tabata no mucho menos esta 9.919 pashent cu a ser admiti na HOH cu un promedio di estadia di 4,3 dia. Interesante pa mira ta cu 58,8% (5.909) tabata admision planea y tambe 55,2% di admision durante 2024 tabata hende muhe. E ocupacion di cama a subi na 2023 te na 90,8% y na 2024 e la baha back pa 87,2%. Aunke ta solamente 3,6% no mester lubida cu durante 2024 tabatin diferente camber sera y servicio cu mester a cancela pa algun siman door di trabounan di construccion cu ta hiba na reduccion di uzo di cama.
Departamento di emergencia
Na aña 2024 a dicidi di separa e cifranan di Dokter na warda cu di Departamento di emergencia cu ta hiba na reduccion den cifra si compara cu e cifranan cu nos tin di añanan anterior, pero tene bon na cuenta cu esaki no ta nifica un reduccion den bishitante di Departamento di emergencia mes.
Testnan di radiologia
Na 2024 Departamento di radiologia a haci un total di 55.023 test diagnostico manera x-ray, echografia, MRI y mas. Esaki ta 4,2% menos cu na aña 2023 cu tabata 57.437 test. E motibo tras di esaki tin di haber cu mester a muda e Departamento di radiologia door di construccion andando. Consecuentemente cierto testnan no por a tuma luga, pa un tempo pues mester a cancela y duna cita nobo y solamente por a sigui haci testnan diagnostico cu ta di emergencia.
Consulta di pashent cerca specialista
Na 2024 specialistanan cu ta traha pa Hospital a haci un total di 84.694 consulta cu pashent cu ta un aumento di 6,97% mas cu na 2023 cu tabata un total di 79.175 consulta. Alabes esaki tambe ta un di e motibo pakico tin mas peticion pa testnan di laboratorio, esta cerca LabHOH si compara esaki cu na 2023 unda ta mira un aumento tambe di 22.06%.
Baby cu ta nace na Aruba
Mundialmente e trend ta sigui y Aruba no ta keda atras, paso cerca nos tambe ta mira cu e total di baby cu a nace na 2024 ta un total di 878 baby cu ta 5.81% menos cu na aña 2023 unda cu yama bon bini na 929 baby.
Un aña un bes mas den su totalidad hopi exitoso pa Hospital unda cu a brinda cuido na no solamente comunidad di Aruba, pero tambe turistanan cu ta bishita nos isla y tambe pashentan no documenta. E transparencia aki ta parti di vision y mision di Hunta di Directiva hunto cu team di maneho di HOH pa asina clientenan, pashent y bishitante tin mas claridad di e diferente servicionan cu ta wordo brinda.
Na ana 2025 como Hospital nos compromiso y vision ta y lo keda pa brinda cuido medico accesibel di calidad na un y tur sin importa rasa, genero, edad y cultura paso nos di HOH semper t’ey.
