Dedicacion y teamwork ta den su ‘higra’
Colega Oslin Henricus a hay’e poco straño cu su clustermanager a pidi’e pasa cerca dje. Pero sin pensa dos biaha ela bay y sin sa cu tin un sorpresa grandi prepara pe. Na momento cu e ela pasa busca su ‘koffie’ pa djey pasa cerca clustermanager su coleganan brancardier, diferente hefe y tambe su coleganan di piso B3 y otro departamento a grita ‘surprise’. Ela keda keto un rato prome cu a realisa kico precies tabata pasando. Hopi sorprendi Oslin tabata ora ela realisa cu e ta e prome empleado di luna di aña 2025.
Semper Oslin ta yega mas trempan cu su shift pa prepara su dia. Su funcion ta brancardier, pero e tin talento pa haci mas cos cu no ta parti di su trabou regular. E ta bisti mas pechi entre otro ta mantene tur rolstoel y ta percura pa nan tur funciona manera debe ser. Ademas ta haci reparacion unda tin mester sea ta riba rolstoel, kashi of cualkier cos riba cualkier piso. Asina e ta bay e ‘the extra mile’ y ta yuda pensa con por mehora algo of hacie diferente pa bin cu solucion. Nada ta dimas pe y e ta yuda cualkier caminda na HOH cu nan mester di un extra man.
Banda di ta brancardier, e ta un miembro hopi activo di HOH su Hulpverleners Team (HVT). E ta yuda cu diferente training y ta ripara ora algo no ta corecto cu por stroba na momento di un calamidad, por ehempel si un cama ta blokia un salida di emergencia.
Oslin ta cumpli cu tur su trabou y semper ta amabel, rustig y ta trata tur hende, specialmente pashent, cu hopi respet. E ta un colega hopi flexibel, no solamente durante orario di trabou pero tambe den yuda colega y asisti pashent y nan famia. E ta duna e servicio y atencion cu nan tin mester y ta duna extra di su mes pa sigura cu su servicio di brancardier ta mas placentero posibel pe pashent.
Pa resumi, Oslin ta un empleado cu tin un balor inmenso pe organisacion. E ta dedica na su trabou, su pashentnan y su team den su totalidad. Un persona cu gusta su trabou y ta super motiva y no lubida e sonsrisa cu semper t’ey. Coleganan ta contento cune y siguramente ela demostra di merece e bunita titulo di ta empleado di luna. Hunta di directiva y team completo di HOH ta felicita Oslin pa su reconocimento como empleado di luna di januari 2025. Masha pabien Oslin!
FIN
